Asturies tien 12 empreses ente les más contaminantes d'Europa

La Comisión Europea y l'Axencia Europea del Mediu Ambiente (AEMA) presentaron güei la web na que s'enxerta'l primer Inventariu Européu d'Emisiones Contaminantes, un llistáu que ye de llibre accesu pal públicu xeneral. La comisaria europea de Mediu Ambiente, Margot Wallstrom, xustificó la creación del inventariu como una ferramienta democrática pa poner a la mano de tolos europeos la información sobre les industries contaminantes que s'asitien na so rodiada, en cuantes que ye daqué qu'afecta directamente a la calidá de vida. El rexistru del EPER -nome n'inglés del llistáu- tien un estoyu de 10.000 complexos industriales y vertederos asitiaos nos 15 estaos de la UE, Noruega y Copenhague clasificaos acordies a la presencia nellos de 50 axentes contaminantes distintos. Nel website del EPER pue sacase l'índiz de contaminación d'una fábrica pol nome, códigu postal o asitiamientu y tamién conocer el volume d'emisiones d'una rama específica de la industria o d'un país.
Asina, po poner un casu, l'almoniacu, un de los contaminantes que recueye l'EPER, produzse mayormente nes 3.029 grandes ganaderíes de gochu y avícoles, mientres que la industria química fai el 53% del mercuriu que se suelta a la mar.


Asturies apaez con nome propiu nel llistáu, y ye que 12 de les fábriques más grandes del país tan nel EPER. Aceralia, la empresa d'aluminiu Alcoa (antigua Inespal) la papelera de Navia, y, sobremanera, el sector eléctricu, son les aportaciones asturianes más importantes al EPER. Dientro del parque térmicu asturianu, la central d'HC n'Aboño sal como la segunda térmica española con más volume d'emisiones de CO2 con 7,6 millones de tonelaes al añu, superada namás pola d'As Pontes Rescampla que, xunta la térmica d'Aboño asítiase la fábrica de cementu de Tudela Veguín, que pon otres 5,45 millones de tonelaes de contaminante. Soto de Ribera, tamién d'HC, con 3,26 millones de tonelaes, Soto de la Barca, de Fenosa, con 3 millones, y Lada, d'Iberdrola, con 1,7 millones de tonelaes de CO2 completen la llista, faciendo un total de 15.6 millones de tonelaes de CO2 al añu. A esti volume que produz la industria eléctrica hai qu'amesta-y lo que sal d'otres como la siderurxa. Aceralia apaez como la más contaminante d'esti sector, con 5.7 millones de tonelaes de CO2 emitíes, de les que más de la metada (2.9) salieron de la fábrica de Veriña.

Polos datos del EPER conozse que la Ría d'Avilés apaez como un de los llugares más afectaos polos vertíos directos al agua. A la ría vierten agües Aceralia-Avilés, Alcoa Inespal y Asturiana de Zinc. Ente ellos vierten a la ría cantidaes bultables de zinc, cobre, plomu, fósforu, bencenu, toluenu y xilenu ente otros componentes. Los vertíos a l'atmósfera amiesten dende les 2.8 millones de tonelaes d'Aceralia hasta les 1.400 d'oxidu d'azufre d'AZSA.