Asturies, tercer comunidá con más xuba del paru en setiembre

El paru xubió n'Asturies el 3,66% nel mes de setiembre, dexando'l total de demandantes d'emplegu nes llistes de les oficines del país en 51.137 persones

Si setiembre suel ser un mes malu pal mercáu llaboral, n'Asturies ello notóse enforma, pasando la xuba del paru en más de dos puntos la media del estáu, que foi del 1,25% contra'l 3'66% asturianu. Namás les comunidaes de Cantabria (+3,92%) y Castiella y Llión (3,89%) pasaron la xuba de paru asturiana, mientres que comunidaes como Valencia, Euskadi o les Islles Canaries foron a baxar la llista de demandantes d'emplegu.

En númberos absolutos, el paru xubió n'Asturies en 1.805 persones, colo que se pasa de la cifra sicolóxica de les 50.000 persones pa ponese la estadística en 51.137. Na evolución interañal, Asturies tien anguaño 453 paraos más qu'en setiembre del 2003, lo que fai una xuba porcentual del +0,89%

Ver equí tolos datos na web del INEM