"Asturies ta perriba de too y de toos", afirma José María García

|
José María García en TPA

El periodista, con venceyu con Ḷḷuarca, afirma en 'Oído cocina' de RPA que "arrenuncio a la mio condición de madrilanu; soi asturianu".

El líder per años de los programes radiofónicos deportivos nocherniegos, José María García, nunca dulda n'emponderar a la que considera la so tierra, magar de nacer lloñe d'Asturies. Entrevistáu por Carlos Novoa nesti espaciu que tien la gastronomía como fondu, aseguró'l miércoles pasáu, 8 de setiembre, que "munchos pensarán que soi mui mayor pa emocioname, pero Asturies ta perriba de too y de toos".

A lo llargo de la charra tamién apuntó que "nací en Madrid, pero arrenuncio, como dixi en munches ocasiones, a la mio condición de madrilanu. Madrid tratóme bien y diómelo cuasi too, pero soi asturianu. Enxamás voi escaecer esos branos tremendos de trés meses en Luarca, en Merás, en Ferrera, en Trevías, Salas, Tapia... Aquellos son les mios herencies y aquello soi yo". Cola autenticidá que marca a García, nun duldo tampoco en criticar el proyeutu de Superlliga encabezáu pol presidente del Madrid, Florentino Pérez, y el periodismu actual, sobremanera'l deportivu señalando a Josep Pedrerol y al so programa 'El chiringuito de jugones', onde'l mandatariu mandridista presentó esta iniciativa refugada pol mundu del fútbol.

Na imaxe, García na so participación nel 2015 nel programa 'Vidas públicas, vidas privadas' de Justo Braga en TPA.

Contador Estadistiques