Asturies sigue cola natalidá más baxa del mundu

Asturies sigue na cabeza de los países que más xente ta a perder. Esta ye la conclusión principal que somos a estraer de les últimes estadístiques qu'hai poco foren feches públiques. D'un llau, el SADEI asoléyanos datos que falen de que n'Asturies ye muncho mayor el númberu de persones que muerren que les que nacen, yá que nel añu 2.001 Asturies rexistró un crecimientu vexetativu negativu que vuelve facenos la zona del mundu con menos natalidá.

D'otru llau, según l'avance del estudiu sobre'l movimientu natural de la población en 2.001 fechu pol Institutu Nacional d'Estadística, la continuada pérdiga de población--tendencia que dura yá dende la metada de la década de los ochenta--ha echase tamién a cuenta de la escasa afluencia de inmigrantes a Asturies, situación contraria a la de delles rexones españoles, que gracies a la presencia d'un mayor númberu d'estranxeros foren a algamar les tases de fecundidá más altes dende 1995.

Caravia, Degaña y San Martín d'Ozcos foren en 2000 los únicos conceyos asturianos que llograren aumentar la so población: con 4/3, 15/11 y 4/2 (nacimientos/fallecimientos, por conceyu, respectivamente). Como ye fácil de pescanciar, estos datos tán lloñe de compensar la tendencia demográfica xeneral del restu del país, de manera qu'en 2.000 Asturies perdió en total 5.493 persones, con 12.317 defunciones énte 6.824 nacimientos.

Otru datu que según delles fontes había ponese en rellación cola nuestra natalidá, ye que, según l'informe sobre Movimientu Natural de la Población en 2001 del I.N.E., la tasa de nupcialidá d'Asturies ta nel 4,85%, un bon cachu per baxo de la media del 5,12%, que tien l'estáu español. El númberu de matrimonios n'Asturies fo 5.095.