Asturies, segunda comunidá autónoma en densidá de centros comerciales

Les últimes estadístiques asoleyaes pola Asociación Española de Centros Comerciales asitien a Asturies como una de les comunidaes autónomes nes que la superficie de centros ye mayor en rellación a la población. Según la estadística, que correspuende al añu 2003, Asturies tien 375 metros de superficie en centros comerciales por cada mil habitantes, y penriba nuestro namás queda La Rioja con 394. Madrid, que ye la comunidá autónoma con más superficie absoluta en m2 dedicada a centros comerciales, dispón de 372 m2 de superficie comercial por cada mil habitantes.

Los dos grandes centros comerciales que s'inauguraron en Madrid a lo llargo del 2004 podríen facer qu'Asturies baxare a la tercer posición nesta estadística, pero de cualquier manera, nun baxaría más, en cuantes que les Islles Canaries, cuartes nel llistáu, disponen de 329 m2 por cada 1.000 habitantes, ello ye, 46m2 menos, y, en tou casu, Asturies perpasa con bastante la media estatal de 219 m2 de centru comercial por cada 1.000 habitantes. En númberos absolutos, Asturies tien 402.387 metros cuadraos repartíos ente tolos centros comerciales del país, lo que supón qu'Asturies tenga'l 4,4% del total estatal de metros cuadraos de centros comerciales, ello con ocupar Asturies aprosimadamente'l 2% de la superficie d'España.

Nos sos estudios l'Asociación Española de Centros Comerciales sorraya como delles comunidaes autónomes grandes, ente les que se refier esplícitamente a Cataluña, apliquen midíes más dures que torguen una mayor presencia de centros comerciales, lo que lleva tamién a desigualdaes territoriales na presencia de centros comerciales