Asturies sal a la cai esti Primeru de Mayu

|

El llunes, 1 de mayu, celébrase’l Día Internacional de los Trabayadores, y miles d’asturianos y asturianes salen a la cai pa conmemorar esta xornada y reclamar derechos llabores. Avilés acueye la marcha de los sindicatos mayoritarios y Xixón, la de los minoritarios, con presencia d’un bloque soberanista.

La Unión Xeneral de Trabayadores (UXT) y Comisiones Obreres (CC OO) van emplegar el lema ‘No hay excusas’ cola fin d’esixir “emplegu estable, salarios xustos, pensiones dignes y más proteición social”. La cita ye al meudía na Plaza del Vaticanu, n’Avilés, y na convocatoria nun va tar la Unión Sindical Obrera (USO), que nesta ocasión entama la so manifestación central n’Uviéu (12 hores, plaza la Constitución).

La Corriente Sindical d’Izquierda (CSI), la Confederación General del Trabajo (CGT), el Sindicatu Unitariu Autónomu de los Trabayadores de la Enseñanza d’Asturies (SUATEA) y la Confederación Nacional del Trabayu (CNT) van marchar peles cais de Xixón, con salida a les 12.30 hores de L’Humedal, baxo’l lema ‘Tiempu de llucha. Tiempu de nós. ¡¡Toma la cai!!’. Ente les munches demandes de los convocantes, destaca la oposición a la reforma llaboral; la de les pensiones; los retayos na Sanidá, la Educación y los Servicios Sociales; les privatizaciones; la emigración forciada, les guerres, les fronteres y los xenocidios; y el terrorismu capitalista, machista, lgtbfóbicu, racista y fascista.

La iniciativa #LluchandoPolaSoberanía va tornar a sofitar la manifestación de los minoritarios “treslladando un mensaxe empobináu a la necesidá de la llucha obrera, pero al mesmu tiempu señalando tamién la importancia de que les alternatives les construyamos dende Asturies y p’Asturies, fuxendo de discursos, igües o proyeutos que vengan prefabricaos dende fuera y nun atiendan a la realidá concreta del nuesu pueblu, asina como fuxendo tamién del sucursalismu, la sumisión y l'ausencia de polítiques propies, que lleva esperimentando Asturies dende va cuantayá”. Otra manera, depués de la marcha per Xixón, Para@s y precari@s d'Asturies entama una folixa solidaria nel Muséu del Pueblu d’Asturies con puestos de coleutivos sociales y cooperatives llaborales d'economía social y comerciu xustu, una xinta popular, xuegos tradicionales, actividaes pa toles edaes, bailles y conciertos, ente otros.

Contador Estadistiques