Asturies remató mayu con baxada del paru

Al acabar el mes de mayu, el númberu de paraos rexistraos nes Oficines del Serviciu Públicu d'Emplegu del Principáu d'Asturies foi de 53.994 persones, lo que supón respective al mes anterior una mengua relativa del -5,91 % y absoluta de -3.393 paraos. Respective al mesmu mes del añu anterior, la interanual cambia de signu y apunta una xuba de+1.512 persones na llista'l paro, lo que supón una xuba porcentual del +2,88 %. Ello con ser la baxada de mayu del 2004 más marcada que la de mayu del 2003, cuando'l desemplegu baxó en -2.527 paraos (-4,59 %).

La baxada del paru centróse sobremanera nel paru masculín, que baxo en -1.444 persones, quedando en 21.463 (-6,30 %) mientres que'l paru ente les muyeres namás baxó en -1.949 persones.

Con ello hai agora n'Asturies 32.531 paraes lo que quier dicir que'l 60,25 % del total de paraos del país son muyeres. Sicasí, la interanual entorna otra vuelta los datos del mes, resultando que de mayu del 2003 a mayu del 2004 hai +1.919 homes más en paru mientres qu'hai 407 muyeres menos.

El colectivu de menores de 25 años baxa'l so volume de paraos en -732 persones, asitiándose en 8.332 y acusando muncho la baxada del mes, mientres que per sectores l'agricultura rexistra 40 desemplegaos menos, la industria otros 248, la construcción 243 y los servicios, que son los que más tiren pol emplegu nestos meses de veranu, resten otres 2.291 persones a la llista de demandantes d'emplegu.

Per conceyos, el paru baxa en casi toos, rexistrándose namás xubes mui pequeñes en conceyos como Bimenes o Carreño. La baxada más fuerte del paru dase en Xixón de (-797) y Uviéu (-781) anque tamién Avilés (-241) Mieres (-203) y Siero (-177) aporten datos bonos a la estadística.