Asturies rebaxa a 6 el máximu de persones nes celebraciones navidiegues

|
Mesa de Navidá con copes

El Gobiernu, magar la tendencia descendente de la pandemia de COVID-19 de les selmanes últimes, decide endurecer les restricciones nel país pa les fiestes navidiegues, que se complementen coles anunciaes el vienres hasta’l día 11. El máximu de persones nes celebraciones pasa de 10 a 6, mentes que’l toque de queda adelántase de la 1.30 a les 00.30 hores.

El Boletín Oficial del Principadáu d’Asturies (BOPA) va espublizar esta tarde la modificación del decretu del 11 d’avientu pa torgar l’espardimientu del coronavirus SARS-CoV-2 na Navidá, feches de muncha movilidá, en concreto del 23 al 6 de xineru. El cambiu principal ye la mengua de les persones que se van poder xuntar nes feches señalaes, esto ye, los díes 24, 25 y 31, y 1 y 6 de xineru.

Nun primer momentu la cantidá máxima yera de 10 pertenecientes a non más de dos grupos de convivientes, mentes qu’agora pasa a ser de 6, la mesma cifra qu’en cualquier otru axuntamientu priváu. D’igual forma, el toque de queda en Nuechebona y Nuechevieye pasa de la 1.30 a les 00.30 hores, calteníendose hasta les 7.

Va siguir permitiéndose la entrada al país, que permanez zarráu, pa familiares y allegaos, desplazamientos qu’han de ser acreditaos. Nel primer casu, namái ye posible en rellación hasta segundu grau, ye dicir, hermanos, güelos y nietos.

Otres restricciones hasta’l día 11

Estes midíes compleméntese coles temporales afitaes pola Conseyería de Salú na tarde del vienres hasta’l día 11, con entrada a valir el sábadu. Na resolución márquense pautes d’actuación pal comerciu, la hostelería, la cultura y l’actividá deportiva, amás de prohibir l’enseñu universitariu presencial y los grandes eventos y espectáculos, y establezse la normativa pa los agospios y l’actividá turística.

Contador Estadistiques