Asturies quier coordinar l’usu d’estaciones meteorolóxiques en Picos colos territorios vecinos

El Gobiernu plantegó a Cantabria y Castilla y Lleón la posibilidá de coordinar l’usu d’estaciones meteorolóxiques nos Picos d’Europa. Asturies participó estos díes nunos exercicios práuticos de rescate en montaña n’Alto Campoo.
 
María José Ramos, conseyera de Presidencia, Xusticia y Igualdá, fixo la propuesta de que los tres territorios vecinos se coordinen pa la instalación y l’usu de los datos de las estaciones meteorolóxiques que s’ubiquen nel Parque Nacional de Picos d’Europa tres asistir a la VII Xornada Téunica de Coordinación d’Emerxencies que nesta ocasión celebróse na estación invernal cántabra d’Alto Campoo. Seis abellugos de montaña van contar con estaciones d’esti tipu tres un conveniu cola Conceyalía de Cultura y la Federación Asturiana de Montañana: Vegarredonda, Vega d’Ariu, Cabrones, Tenerosa, Meicín y Urriellu.
 
Los datos d’estes estaciones meteorolóxiques “van contribuyir de manera notable a meyorar l’asistencia de les emerxencies, sobre manera n’aquelles nes que pueda intervenir l’helicópteru medicalizáu de Bomberos d’Asturies, yá que nestos casos resulta clave conocer la situación meteorolóxica pa saber si se pue movilizar o non l’aeronave”, afirmen dende Presidencia. D’igual forma, los representantes de los tres territorios tamién trataron el proyeutu de Llei de Proteición Civil y falaron sobre les tases y contribuciones especiales poles prestaciones de los servicios d’emerxencies que tienen Asturies y Cantabria. Los dos territorios destacaron el carauter disuasoriu d’esta midida, que dende la so entrada en vigor tovía nun tuvo que facese efeutiva nel nuesu país.