Asturies queda ensin cuota llechera

El sindicatu agrícola COAG dio esta mañana una rueda de prensa especial pa informar sobre los datos a los que tuvo accesu la organización que demuestren la perda alarmante de cuota llechera que ta yendo a ganaderíes de fuera d'Asturies. Los datos que remana COAG falen de qu'esti añu, cola campaña entovía ensin pesllar, yá marcharon a esplotaciones de fuera d'Asturies 10.747.000 llitros de cuota, una cifra qu'otros años nunca nun pasaba de los 2.800.000 llitros, mientres que, a la contra, les tresferencies de cuota ente esplotaciones asturianes baxaron de 24.181.000 llitros nel 2002 a 16.230.000 nel 2004. COAG echá-y la culpa d'esta situación a la entrada en vigor del Real Decretu 347/2003, que regula la venta de cuota llechera y apauta nueves normes pa la tresferencia de cuota ente esplotaciones de comunidaes autónomes distintes. Según Marino Fernández, secretariu xeneral de COAG - Asturies esti decretu ta "afalando la destrucción paulatina del sector llecheru asturianu, demostrando la falta de sensibilidá del Gobiernu español colos ganaderos que viven en zones desfavorecíess o de montaña" Estos ganaderos acaben vendiendo cuota fuera enantes de siguir con una actividáque yá nun ye rentable.

Yá de la que se presentare'l Real Decretu que regula anguaño'l mercáu de cuota llechera, l'antiguu Conseyeru d'Agricultura y Ganadería Santiago Menéndez de Luarca alvirtió de los efectos negativos que podía tener sobre les zones más desfavorecíes del campu asturianu, y valoró'l documentu como "auténtica lliberalización que va dañar sobremanera a les esplotaciones familiares". Un añu dempués d'estes pallabres Marino Fernández declaró na rueda de prensa de güei que la fuga de cuota ta notándose nun mayor despoblamientu del campu asturianu, y la so organización sindical anunció que va pidir que se promulgue una normativa nueva que torgue la salida de cuota de les zones de montaña y desfavorecíes y que la cuota se distribuya acordies a criterios sociales qu'ayuden a fixar población y al caltenimientu de la ganadería familiar. Según COAG, l'efectu de la lliberalización de la cuota tamién lu acusen los consumidores, "que tan mercando un lleche que vien cada vegada más de fuera y que ye de duldosa calidá alimentaria".