Asturies prorroga con una incidencia acumulada de 355 la fase 2 modificada, na que s’entró con 195

La incidencia acumulada n’Asturies nos 14 díes previos al 14 d’ochobre, la xornada anterior a la vuelta a la fase 2 modificada, yera de 194,8 casos por cada 100.000 habitantes. Magar les midíes entamaes estes dos selmanes últimes, el xueves prorrogose esti estáu otros 15 díes al rexistrar el martes 355,1 casos.

La fase 2 modificada entró en vigor el día 15 con 188 positivos na xornada previa, mentes que l’ampliación de la mesma faise con 333, cantidá qu’aumentó enforma’l miércoles y ayeri: 394 y 435, de manera respeutiva, récores de la pandemia. Entes les restricciones afitaes rescamplaben la prohibición de la celebración d’amagüestos –“actividaees lúdiques serondiegues” reza la resolución–, la imposibilidá pa la hostelería d’emplegar les barres y l’impedimentu de vender alcohol más allá de les 22 hores pa los comercios minoristes o d’usar les duches y vestuarios de los centros deportivos, con una llende de 6 persones non convivientes pa los axuntamientos de persones en llugares públicos o privaos.

Dende’l sábadu tamién s’aplicó’l zarru perimentral de Xixón, Uviéu y Avilés, y el miércoles amplióse a tol país. D’esta forma’l Gobiernu pretende frenar l’ascensu de la curva pa torgar un posible confinamientu como’l de marzu.

La prórroga de la fase 2 modificada va ampliar les restricciones venceyaes a la mesma hasta’l 13 de payares.

Na semeya, el conseyeru de Salú, Pablo Ignacio Fernández Muñiz, esta mañana nuna xunta telemática colos alcaldes del país.