Asturies promociónase en Reinu Uníu como destín pa la observación de flora y fauna

El Principáu participó la pasada fin de selmana en la feria de turismu de naturaleza Birdfair Rutland, nel Reinu Uníu para promocionase como destín turísticu.

El públicu de la feria, pola que cada añu pasen 25.000 persones, ye d'altu poder adquisitivu, sensibilizáu col caltenimientu y protección del mediu ambiente, ya interesáu en buscar llugares desconocíos pa la observación de distintes especies de fauna y flora.

Técnicos de la Sociedá Pública de Xestión y Promoción Turística y Cultural del Principáu contactaron en Birdfair Rutland con axencies de viaxe y medios de comunicación especializaos como BBC Wildlife y Bird Watching Magacín y atendieron consultes particulares. L'oxetivu ye ampliar la presencia d'Asturies nos catálogos d'axencies como Birdholidays, Naturetreck, Limosa, Heatherlea y Rockjumper, dada la importancia de la intermediación nesti segmentu, nel que los turistes acuten con muncha antelación paquetes zarraos con tolos servicios incluyíos.

L'espaciu promocional del Principáu, allugáu nel estand de Turespaña, permitió dar a conocer al mercáu británicu destinos como Cangas y Somiedu pa la observación d'osos; la zona central d'Asturies p'asistir a la berrea de venaos y les ríes de Villaviciosa y del Eo pal avistamientu d'aves llimícoles, ente otros enclaves. Estes especies espertaron muncho interés ente un públicu que conoz bien el Parque Nacional de los Picos d'Europa, mui valoráu ente los británicos poles sos aves rapaces. Orquídees y camparines complementen los grupos d'especies nos sos viaxes a Asturies.