Asturies promociónase como destín de congresos nel IBTM World

Avilés, Xixón y Uviéu protagonicen el puestu d’Asturies nel XXXII Incentives & Business Travel Market (IBTM) World, la feria más importante del mundu sobre turismu de congresos que vien acoyendo estos años Barcelona. Ésta comenzó’l martes y va allargase hasta’l xueves.

Mientres estos díes, les oficines de congresos d'Asturies promocionen el país como destín de congresos, viaxes d'incentivu, eventos y aconceyamientos énte veceros internacionales nuevos, asina como pa retomar el contautu con axencies d'eventos estales con sede en Barcelona o movíes hasta’l IBTM World coles que yá se collaboró enantes. Esta edición cuenta con unos 3.500 espositores y atrái a más de 15.000 profesionales.

L’eventu con sede na Fira de Barcelona constitúi ún de les cites internacionales más destacaes del añu pa esti segmentu de negociu. Los Convention Bureaux d'Avilés, Uviéu y Xixón centralicen les sos aiciones nel puestu d’Asturies p’atrayer entamadores de congresos y eventos al país.