Asturies promociónase en Nantes como destín turísticu y gastronómicu

La ‘Sociedad Regional de Turismo’ organizó esti xueves un actu en Nantes pa promocionar Asturies como destín turísticu y gastronómicu. La entidá escoyó esta ciudá pola puesta en marcha de la ‘autopista del mar’ nel mes de setiembre.
 
Autoridaes y periodistes de los principales medios de comunicación franceses probaron de primer mano les delicies asturianes más representatives preparaes por Nacho Manzano, cocineru con dos estrelles Michelín responsable de Casa Marcial. Asina, los comensales xintaron un menú-degustación formáu por dellos quesos asturianos –Cabrales, Beyos, Afuega l’pitu y Gamonéu–, revueltu de la casa sobre tortu de maíz, oriciu con holandesa acidulada y aromáticu sobre yogur; panceta con vinagreta de falda y el so caldu, llubina del Cantábricu asada con almidón de pataca afumáu y, pa zarrar, mazana asada con nata al romeru y velu de sidra, y arroz con lleche. P’acompañar sirvióse sidra y vino de la Tierra de Cangas.
 
Esti actu pa promocionar el país nel territoriu francés tuvo una bona repercursión ente los medios de comunicación, puesto qu’asistieron periodistes de 22 periódicos y radios xeneralistes y especializaos. Asina, hubo representación de Marie Claire Ouest, Presse Ocean, Ouest France Nantes, Neo Restauration, Elle Magazine, Wik, Kostar, Sans Medias, Le Nouvel Ouest, Nej Cherie FM, Virgin Radio, Dolcerama.FR, Cuisine Actuelle, Femme Actuelle, Prima Cuisine Gourmande, Fromage Gourmand, Regal, L’Echo de L’Ouest, Radio Cote D’Amour, Hit West, Objectif Une, Madame Figaro y France Bleu Loire Ocean. Mentes, por parte asturiana, acudió la xerente de la ‘Sociedad Regional de Turismo’, Noelia Menéndez Díaz, y el presidente de la Sociedad Mista de Turismu de Xixón, José María Pérez.
 
Amás d’esti eventu, encuadráu dientro del Plan de Competitividá Turística de Turismu Gastronómicu del Principáu d’Asturies, el país va participar nel Salón Internacional de Turismu de Nantes que va principiar esti vienres. D’esta forma, Asturies quier llegar al públicu del oeste de Francia, zona cola que’l país ta comunicáu por mar dende’l mes de setiembre gracies a la ‘autopista del mar’ que xune El Musel col puertu de Nantes-Saint Nazaire. Pa ello, la ‘Sociedad Regional de Turismu’ editó una guía col nome ‘Tol mundu fala d’Asturies: 12 razones pa visitala”, orientada al públicu francés.