Asturies promociónase en Londres ente sevillanes y campos de golf

España va tomar la londinense Regent Street nún actu de promoción turística que va celebrase esti domingu 3 de setiembre na capital inglesa. Asturies va acudir a la cita dientro del requexu acutáu pa les comunidaes de la marca turística "España Verde"

La promoción turística anúnciase espectacular, sostituyéndose esi día nacéntrica cai de Londres a coches, autobuses y taxis por una playa artificial con sable auténtico y llugares acutaos pa tomar el sol, naranxales floríos, eshibiciones de sevillanes y flamenco y hasta un campude golf de nueve furacos apurríu polos responsables andaluces de turismu,amás del indispensable vinu de La Rioja y preba de tapes. Más de 30.000 persones acuden tolos años al festival de Regent Street, qu'organicen nesta edición la Oficina Española de Turismu en Londres y los comerciantes de la mesma Regent Street.

Toles comunidaes autónomes, dende Cataluña hasta Murcia, se presenten con espaciu propiu al festival de Londres, sacantes Asturies, Galicia, Cantabria y Euskadi, que van dir a Londres dientro del requexu acutáu pa la promoción de la "España Verde" marca qu'axunta a Galicia, Asturies, Cantabria y Euskadi, Asturies va apurrir al actu la participación de gaiteros, mientres que nos puntos d'Información Turística los visitantes van alcontrar información y cartafueyos sobre les playes, equipamientos culturales y hoteles d'Asturies, que tien precisamente con Londres, al traviés de la compañía EasyJet la so única conexón aerea internacional al traviés de vuelos baratos.