Asturies presenta un stand más pequeñu en Fitur tres recortar un 30 por cientu'l presupuestu pa la cita

Un stand más pequeñu y una orientación más comercial. Éstes son les dos novedaes principales de la presencia d’Asturies na Feria Internacional de Turismu (Fitur) que principia esti miércoles en Madrid y que va allargase hasta’l domingu.

El presupuestu del Gobiernu pa esta cita referencia del sector turísticu a nivel estatal menguó nun 30 por cientu con respeuto a la edición pasada. El stand nuevu d’Asturies nel IFEMA, que nun va acoyer actos institucionales grandes, tien 630 metros cuadraos, 130 menos que nel 2011, anque duplica l’espaciu dedicáu a la contratación. Esti añu, la campaña de promoción asturiana céntrase na emoción, buscando la inmersión del visitante nel abanicu grande d’esperiences qu’ufre’l país al traviés de 41 semeyes de formatu grande. Pa optimizar costes, aprovechóse la estructura de la edición anterior anovándolu con fotografíes qu’ilustren la diversidá de propuestes. La gastronomía ocupa un llugar destacado como exe sobre’l que xiren la naturaleza y la cultura.

El sector turísticu asturianu dispón esti añu d’un área de profesionales compuestu de 20 meses onde los empresarios y asociaciones mantendrán entrevistes colos sos potenciales clientes. La zona de trabayu amplíase con una sala preparada p’acoyer presentaciones, firmes d’alcuerdos y alcuentros formales. El xueves va tener llugar, amás, un taller de trabayu con canales ‘on line’ nel que van poder participar toles empreses asturianes interesaes. 15 plataformes de promoción, posicionamientu y comercialización ‘on line’ yá tán inscrites.

Folletos con imáxenes “mui asturianes”

El públicu xeneral de Fitur, pal que la feria abre les sos puertes na fin de selmana, va atopar nel stand asturianu un mostrador nel que’l personal de 16 asociaciones y entidaes del país, amás del propiu de la Sociedad Regional de Turismo, van ufrir información personalizada sobre los recursos de tol territoriu. Los visitantes tamién van poder somorguiase nun 'Rincón de Escapadas', onde un grupu d’axencies de viaxes de receptivu y dalguna cadena hotelera ofrecerán-yos propuestes de fin de selmana, paquetes vacacionales y ofertes especiales. Pa esta ocasión, el Gobiernu marcó una llinia nueva de diseñu pa los folletos basada n’imáxenes "mui asturianes" que busquen llegar direutes a la emoción del viaxeru.