Asturies prepara cambeos pa los visitadores médicos

El Gobiernu asturianu quier poner una normativa nueva sobre les visites a médicos. El Gobiernu d´Asturies quier regular al través d'un decretu que yá tien cásique rematáu l´actividá d´estos axentes comerciales menguando de forma bultable les sos visites comerciales a los médicos. Según la Conseyería del ramu, que dirixe Rafael Sariego, les visites son escesives y torguen enforma'l trabayu de los médicos, . Hasta agora cáun de los visitadores organizaba l'axenda de visites y el númberu de les mesmes, pero d'agora en p'alantre les normatives van ser les que van imponer l'horariu de trabayu a los visitadores, qu'amás van tener qu'axustase a un protocolu estrictu que namás va permitir una visita al añu por especialidá. La figura del visitador abeyando pelos pasiellos de los hospitales y ambulatorios tamién va desapaecer, y ye que'l decretu que ta yá cásique rematáu manda que la visita va tener de facese nun llugar apautáu que nunca nun va poder ser la mesma consulta del médicu.

Asturies nun ye la única que quier controlar el llabor de los visitadores, y asina la Comunidá de Madrid y la Valenciana tamién tan trabayando na mesma llínia, siendo Madrid la primera en llexislar sobre ello. El casu de la capital del estáu demuestra lo abegoso que pue ser regular el sector, y ye que'l gobiernu autonómicu madrileñu yá tien amenazao con poner multes porque la llei nun ta obedeciéndose. Fontes de les empreses del sector farmacéuticu, que nun ve bien estes midíes, diz qu'ente Asturies y Madrid hai 1.200 puestos de trabayu que peligren con estes reformes llegales