Asturies prende col primer calor

Asturies entró la selmana santa con una fola de fueu que va facer d'esti marzu ún mes prietu nes estadístiques. Mesmamente ayeri, el serviciu 112 dio parte d'un total de 44 fueos qu'afectaron a 22 conceyos, quedando entovía a última hora d'ayeri un bon númberu d'ellos prendíos, sobremanera nos conceyos de Mieres y Grau.


La temperatura anormalmente alta que se rexistra n'Asturies dende la otra selmana y l'aire que sopla del sur tan faciendo muncho por esparder el fueu. Los 44 fueos que prendieron ayeri afectaron a Llanes, Piloña sufrió Grau, Mieres y Ayande, mientres que'lllunes hebo otros 36 que s'espardieron per 21 conceyos distintos. El domingu 20 prendieren 81 focos de fueu per toa Asturies, el sábadu 170 y el vienres 140. El Gobiernu asturianu, que precisó esti fin de selmana de reclamar ayuda de Madrid p'apagar les llaparaes del fueu, tien activáu'l plan d'emerxencia INFOPA a nivel cero, siendo precisa una autorización de nivel 4 pa prender una foguera. Ello vien dempués de que los guardes rurales criticaren al executivu autonómicu por nun activar yá esti fin de selmana'l plan INFOPA énte la situación de peligru que taba creándose. La época d'últimos de febreru a marzu suel ser mui dada a que'l fueu faiga actu d'apaición pelos montes del país por ser xeneralmente un tiempu secu y con aire del sur en que munches de les quemes de rozu que se faen pelos pueblos puen dexenerar fácilmente nun fueu incontroláu.