Asturies, posible sé del próximu alcuentru européu de Vía Campesina

Asturies podría ser la sé a últimos d'esti añu d'un alcuentru a nivel européu de Vía Campesina, movimientu de defensa del mediu rural y la llucha contra la fame qu'axunta en tol mundu a 156 organizaciones que representen a 200 millones de afiliaos. L'anuncia fízose nun alcuentru ente'l Conseyeru Javier Valledor y el representante de Vía Campesina Paul Nicholson.

Valledor mostróse al favor de que seya Asturies la sé d'esti alcuentru en cuantes que diba permitir enanchar la visión de los problemes que se tan dando na nuestra comunidá en rellación a cuestiones como l'abandonu d'esplotaciones o la perda de recursos naturales. Paul Nicholson concueyó con Valledor nes sos valoraciones y faló de la esistencia d'una "crisis ensin precedentes nel mundu rural" centrando la cuestión nel ámbitu européu onde dixo que "Cada minutu despaez una familia campesina" fenómenu que rellacionó directamente cola imposición de les polítiques neolliberales que Nicholson atalanta que son les que tan imponiéndose n'Europa. Énte esta situación, Valledor aseguró que la intención asturiana ye la d'esplorar les víes de collaboración y aportar a Asturies elementos de sensibilización sobre la situación de l'agricultura mundial.

Vía Campesina ye un movimientu internacional qu'anguaño abarca los cinco continentes y que nació nel añu 1992 nuna xunta en Managua ente líderes campesinos de Centroamérica, Norteamérica y Europa. La primera conferencia mundial del organismu celebróse al añu dempués, 1993 en Mons. Bélgica. La segunda Conferencia Internacional foi en Tlaxcala, México, n'abril del 1996, cola asistencia de 37 países y 69 organizaciones, espoxigando l'alcance del movimientu hasta llegase a la IV conferencia, que se celebró l'añu pasáu en Sao Paulo (Brasil) cola asistencia de más de 1.000 representantes d'organizaciones de tol mundu. La soberanía alimentaría, les polítiques de reforma agraria, créditu y delda externa, l'alcance nel campu de la revolución tecnoloxica o la participación participación de la muyer na vida y economía campesins son los exes del debate que promueve esta entidá, que tamién tien una postura de refuga clara de los organismos manipulaos xenéticamente. De los sindicatos agrarios con representación n'Asturies, l'únicu que ye miembru de Vía Campesina ye COAG.
Más información na web de Via Campesina