Asturies pon el 8,2% de los gases d'invernaderu españoles

La Conferencia Mundial sobre Cambéu
Climáticu de Moscú tien tola traza de dir a convertise nuna repetición de les anteriores, nes que los resultaos nun llegaron a dexar contentu a naide. Según el Protocolu de Kyoto, que se firmó va seyes años, los países más desarrollaos del mundu comprometíense a amenorgar les emisiones de gases d'efectu invernadero nun 5,2% respective a los niveles de 1990. Más de cien países firmaron el Protocolu de Kyoto, pero estos países nun representen nin el 45% del total d'emisiones de gases d'efectu invernaderu. La negativa del primer emisor mundial, los EEXX, dexó'l protocolu coxu, y anque China acabó apuntándose a los mandaos de Kyoto, agora'l mundu ta pendiente de lo que diga Rusia, país emisor del 17% del CO2 del mundu. va un añu parecía que Rusía podía entrar a Kyoto, pero anguaño vese más difícil.

La solombra de les rellaciones ente rusia y EEXX anda tres d'esti asuntu, en que bien poco pinten los intereses mediuambientales. Ello ye que los rusos, que menguaron hasta la mitada la so producción industrial, contaben con poder vender derechos d'emisión a otros países. les estimaciones del ministeriu rusu de la enerxía peritaben ente 500 y 4.000 millones de dólares por esti conceptu. El mayor cliente de los derechos rusos diben ser precisamente losEEXX, pero al negase Washington a firmar el Protoculu de Kyoto, desarmáron-yos la bolera a los rusos, qu'agora tan roceanos énte un tratáu del que nun puen sacar tayada. Putin, que llegó a dicir estos díes que taría bien que recalentare'l planeta porque entós los rusos nun diben precisar de tantu abrigu de piel, pide tamién perres a cambiu d'aceptar los mandaos de Kyoto. Europa yá-y ufiertó dos millones d'euros.

Asturies ta mui lloñe de llegar a lo que diz el protocolu de Kyoto. Según l'inventariu oficial d'emisiones de gases d'efectu invernaderu del añu 2.001 la nuestra comunidá emite'l 8,2% del total de los gases causantes d'efectu invernaderu del Estáu, siendo la quinta CCAA más contaminante tres de Cataluña, Andalucía, Cataluña, Castiella y Llión y Galicia, ello con ser la más pequeña en superficie de les d'esti garapiellu. Esti inventariu, que tamién espeya les variaciones nes emisiones, diz qu'Asturies tuvo una xuba d'emisiones nel periodu 1990 - 2.001 del 14,1%, un tantu por cientu, que, con ser grande, ta perbaxo de la media estatal, que foi del 32,1%