Asturies podría contar con dos centrales térmiques más

El Presidente asturianu Vicente Álvarez Areces dio anuncia esti fin de selmana de la posible instalación de dos nueves centrales térmiques de ciclu combináu nel centru d'Asturies, que vendríen amestase a les que programa Hidroeléctrica del Cantábrico en Soto Ribera y la qu'anunció va poco Iberdrola en Lada (Llangréu). Ello ye que de concretase la llegada d'estos grupos nuevos, que, de momentu nun se quier dicir qué compañía ye la que los fadría, el parque de centrales térmiques asturianes medraría esponencialmente, cola diferencia de que, mientres que tolos proyectos de térmiques nueves coles que se trabaya agora sedríen ampliaciones d'instalaciones que yá esisten, nesti casu falaríase d'una central nueva dafechu.

Grupos ecoloxistes ven innecesaria la instalación d'estos grupos, ente ellos la Coordinadora Ecoloxista d'Asturies, qu'emitió ayeri un comunicáu en que recordó qu'Asturies consume namás ún terciu de la corriente que produz, colo que nun tien munchu sentíu amestar más potencia asitiada nel país. Según la Coordinadora, Asturies tien anguaño 3.811 MW de capacidá de producción, a los que se tien previsto amestar colos proyectos yá en trámite 2.400 más con grupos térmicos de gas y de carbón y 300 más en parques eólicos. La posibilidá d'amestar 400 MW adicionales con estos dos grupos nuevos supondría ponese nuna xuba de más de 3.100 MW de potencia.

Asturies produz con esta potencia una media de 21.000 gw a la hora, pudiendo xubir en casu de ser preciso a picos de más de 24.000. D'esos 21.000, n'Asturies namás se consumen una media de 8.000, marchando tolo demás peles llinies d'alta tensión a otres comunidaes autónomes de la rodiada tradicionalmente deficitaries en xeneración de corriente. Sicasí, la Coordinadora Ecoloxista diz que nun tien sentíu poner más potencia n'Asturies cuando los llugares que suelen importar corriente asturiano tienen tamién en marcha proyectos pa ser a autoabastecese. Ello rellaciónase en gran midida cola entrada del gas natural como combustible con un gran pesu específicu. Mientres hasta va diez años el combustible más importante pa la xeneración de corriente yera'l carbón, la entrada en mercáu del gas crea una realidá nueva que permite asitiar centrales térmiques en cualquier llugar con namás que tirar un gasoductu, torgando les perdes de tensión de la corriente pol tresporte d'alredor del 17% que teníen más xustificación cuando yera preciso que la central tuviere allegada a les mines o a un puertu dende'l qu'entrare carbón d'importación

Por too ello, la Coordinadora pide que nun se pongan más grupos térmicos n'Asturies y que se construyan los de gas que seyan precisos pa sustituyir los de carbón que funcionen anguaño, a oxetu de quedar con una potencia instalada asemeyada a l'actual pero más llimpia.