Asturies pierde ún de los sos poetes na emigración

El poeta y escritor asturianu na emigración Enrique Pérez Álvarez, morrió la otra selmana na so casa de Bonos Aires. Perez, de 95 años, yera natural de Vilaviciosa, y dexa escrito bayura de poemes y cuentos n'asturianu, una actividá a la que se metió, cásique de casualidá, por un apueste con un amigu.

Enrique Pérez González ñaciere'l 2 d'abril de 1909 en Bonos Aires. La so familia yera maliayesa y pa la Villa vieno a vivir cuando tenía cinco años. Ellí foi a escuela, trabayando dempués de barberu y aficionándose a la llectura y a la música, lo que lu llevó a componer dellos tangos y pasodobles. Poco enantes del empiezu de la Guerra Civil, Pérez tornó pa Bonos Aires, lo que lu salvó de morrer a manos de los nacionalistes, como-yos pasó al padre y a un hermanu del escritor, afusilaos n'ochobre del 37 nel cementeriu de Villaviciosa. Dambos yeren persones d'izquierdes bien conocíes en Villaviciosa, y ello yera que'l padre d'Enrique conocíenlu por "Lorenzo'l Bolchevique".

A resultes d'una apuesta ye polo qu'entamó Enrique Pérez a escribir n'asturiano, cosa que nun dexó de facer en tola vida dende que, en 1941, publicare na revista "Asturias" del centru asturianu bonaerense, el relatu "El abrazu del güelu".

Nun foi hasta 1995 que Xurde Blanco ficiere xusticia editorial cojn esti autor espublizando na Llibrería Facsimilar de l'Academia de la Llingua un volume que recueye tola so obra asoleyao y espardío per revistes, amás d'ufiertanos un entamu biográficu del autor onde nos apurre toles informaciones y noticies que d'él y de la so obra conocemos. El llibru (Fayueles y forgaxes) ta dividíu en dos estayes: una poética ("Fayueles") y otra narrativa ("Forgaxes") y vien a poner a esti autor al empar d'otros escritores que pasaron al otru llau del Atlánticu pa prebar la verdadera señardá, como Xiquín de Villaviciosa, Matías Conde o Ángeles López Cuesta. Esti llibru convirtióse bien ceo nún de los más vendíos dientro de la colección a la que pertenez.

Poco dempués, en 1997 l'asociación maliayesa Cubera recuperó'l llibrín Cuentos y pa neños. Poesíes y en 1998 publica l'Academia de la Llingua'l cartafueyu Tres pieces de teatru : (1945-1955), qu'inclui tres piecines teatrales: "Casimiro El Académicu" ; "Un díe de mercáu" y "Qué sabíen de penes".