Asturies pide la vía estrencho

De ferrocarriles falóse tamién ayeri nel Conseyu de Gobiernu del Principáu, nel que'l Gobiernu asturianu dio anuncia de que prepara un recursu d'inconstitucionalidá contra la Llei del Sector Ferroviariu, que tal y como ta redactada agora, torgaría que'l principáu pudiere xestionar les llinies de ferrocarril que trescurren dientro de la comunidá autónoma. El conseyeru de Xusticia, García Valledor, espunxo los argumentos que va apurrir el Gobiernu asturianu pa que se cambie la llei y asina'l Principáu pueda xestionar los más de 600 kilómetros de Ferrocarril que tien la rede asturiana de vía estrencha, competencia que vien reconocida nel Estatutu d'Autonomía nel so artículu 10.1.5

La Llei del Sector Ferroviariu, aprebada en payares del 2.003, tranca la puerte a qu'Asturies pueda asumir la rede propio de ferrocarriles, una descentralización que yá funciona dende va 25 años n'Euskadi y a la que s'amestó poco dempués Cataluña y yá mas de recién Valencia y Mallorca. El gobiernu central encontóse siempre pa nun dar la xestión del ferrocarril en que delles llinies asturianes tienen ramales que siguen per otres comunidaes, colo que nun podía dicise qu'aquellos trenes fueren propios de la CA. Según Valledor, la llei del sector ferroviariu, pensada cola vista puesta na lliberalización del ferrocarril de vía ancho, nun estrema ente llinies autonómiques y estraautonómiques. La reclamación asturiana esixe la entrega a l'autonomía de les llinies ente Xixón y Pola Llaviana, Uviéu a San Esteban y Uviéu - Col.lanzo. El ferrocarril Ferrol-Xixón y el d'Uviéu a Llanes queden fuera de la reclamación por considerase qu'entren a otres comunidaes

D'otra manera, el Conseyu de Gobiernu dio de pasu un aval pa Mina La Camocha por importe de 3,5 millones d'euros. El Principáu xustifica l'ayuda a la mengua y retrasu nel pagu de les ayudes del Institutu del Carbón, mientres que la empresa pon de garantía un plan de xestión y reestructuración que vence n'avientu del 2.005. Amás, el Conseyu de Gobiernu apautó'l conveniu pol que'l Principáu sume la xestión de la obra de saniamientu de la Ría d' Avilés y otru pa la creación del área residencial de Roces, que dexa en manes de Sogepsa la construcción de 3,000 viviendes.