Asturies perpasa la media de conexones a internet

Ye la primer vegada que l'observatoriu fai un estudiu específici sobre Asturies. Con una muestra de 3.500 entrevistes, que se ficieron a últimos mes d'avientu del 2.003, la encuesta espeya los indicadores más importantes n'estensión de las Tecnoloxíes de la Información
y la Comunicación n'Asturies, recoyendo tamién la so evolución de va cinco años p'acá y la posición d'Asturies nel conxuntu del estáu. Ente los datos más importantes del estudiu, el 42,6 de les viviendes asturianes disponen d'ordenador y el 25,6% accesu a internet, cuatro décimes penriba de la media estatal del 25,2%. N'accesu a internet per banda ancho, Asturies stamién perpasa la media, y asina'l 55,5% de les conexones son ADSL o defreba óptico, lo que dexa a Asturies como la primer comunidá na estadística de banda ancho contra'l 44% del segundu clasificáu, Baleares.


Nel usu d'estes nueves tecnoloxíes, el 43,1% de los asturianos usa davezu l'ordenador, el 32,9% la rede internet y el 26,7% dispón de de cuenta de corréu electrónicu. ¿Y pa qué prenden l'ordenador los asturianos? Según l'estudiu siete de cada diez usuarios prenden l'ordenador delles vegaes a la selmana, rescamplando l'usu rellacionáu col ociu (más del 50%) mientres que namás un terciu usen l'ordenador pa trabayar y el restu p'actividaes formatives. Respective a los internautes, el 47% de los asturianos con conexón entren tolos díes a la rede, y el 20,4%, delles vegaes a la semana, asitiando'l país nel cuartu puestu trés de Madrid, Cantabria y Cataluña. L'internauta asturianu mediu conéctase una media de 6
hores y 49 minutos a la selmana, y el 85,8% de los asturnautes usen la rede pa enterase de les noticies. La necesidá de formación vese como la mayor torga pa saca-yos más rendimientu a ordenadores y conexones. Ocho de cada diez entrevistaos piden más cursos y que se-yos aprenda a usar internet (44,5%), bases de datos (40,4%), fueyes de cálculu (37,6%) procesadores de testos (32,5%) y corréu electrónicu (31,9%). El preciu del ordenador (45,6%) y la falta de seguranza a la hora de tresmitir datos personales (44,6%) apaecen como los mieos más espardíos, dañando muncho esti últimu al comerciu electrónicu.


Onde les nueves tecnoloxíes yá tienen más problema pa llegar ye a los pueblos. Nos conceyos de menos de 10.000 habitantes, la tasa de cases con ordenador baxa al 30,4%, y namás el 15,6% dispón de conexón a la rede (el 20,5% d'ellos con ADSL). El furacu de nueves tecnoloxíes nos conceyos pequeños ígüenlu, en parte, los telecentros, qu'empleguen el 28,4% de los ciudadanos. Fuera del ámbitu informáticu, el 64,1% de los asturianos disponen de teléfonu móvil y derca del 30% de viviendesde televisión de pagu.