Asturies perdió un 0,6% de población nel quinqueniu 98-2003

Ta acabante de presentase l'Anuariu Económicu d'España 2004, informe que tolos años asoleya La Caixa. L'informe destaca qu'España rexistró una xuba demográfica bien curiosa nel quinqueniu 1998-2003, con tases de medra del 7% contra'l 2,1% y 3% de quinquenios anteriores. Con too y con ello, hai una comunidá diverxente que ye Asturies, con un crecimientu vexetativu negativu del 0,6% nel quinqueniu y una media de perda de población del -0,1% al añu nuna cayida que se caltién dende 1991.

Acordies colos datos del informe de La Caixa, la única otra Comunidá Autónoma en que baxaba la población dende primeros de los 90 yera Euskadi, pero los vascos entornaron dende 1996 la tendencia a la despoblación y lleven cinco años medrando al ritmu del +0,1% al añu.

La baxa de población d'Asturies rescampla contra'l crecimientu d'otres CCAA casu de La Rioja, que xube nel periodu 98-03 un 9%, el 8,9% de Navarra o los porcentaxes del 11,1% de Valencia, 12,3% de Madrid, 13,8% de Murcia o el 18,9% de les Baleares, que ye la comunidá con más xuba poblacional.

L'anuariu de la Caixa, que pue consultase enteru dafechu on-line, presenta tolos datos y indicadores sociales y económicos de tolos conceyos españoles de más de 1.000 habitantes, lo que representa'l 96% del total del estáu, anque queden fuera de la so base de datos conceyos como Tameza , por poner un casu



D'otra manera, en cuantes a lo que son indicadores económicos, el estudiu de La Caixa espeya una cayida de la renta media en dellos conceyos de la zona central d'Asturies, presentando'l país nel so conxuntu una pequeña desaceleración económica que dexa a Asturies nun nivel 5 de renta, compensando dellos conceyos pequeños el parón de los grandes.

Consultar equí l'anuariu 2004 de La Caixa