Asturies perdería 101.436 habitantes en 15 años según l’estudiu de proyeición de población 2020-2035 del INE

Una mengua del 10 por cientu en 15 años pa liderar el descensu demográficu a nivel estatal xunto con Castilla y Lleón. L’Estudiu de Proyeición de Población del Instituto Nacional de Estadística (INE) cifra en 917.339 el númberu de habitantes que tendrá Asturies nel 2035, lo que significa 101.436 menos qu’anguaño.

Estes proyeiciones de población amuesen la evolución que llevaríen l’Estaú y les comunidaes autónomes nel casu de caltenese les tendencies demográfiques actuales. España ganaría población, un total de 954.497 habitantes (un 2 por cientu), hasta superar los 48 millones de persones nel 2035, cantidá que saltaría la barrera de los 50 nel 2070, mentes qu’Asturies siguiría’l camín contrariu, baxando del millón nos 15 años próximos.

Ésti ye’l periodu que s’estudia nel casu de les comunidaes autónomes, onde Asturies y Castilla y Lleón rexistraríen les peores cifres con una mengua del 10 por cientu, a les que siguiría Estremaúra, con un 8,3 por cientu. Illes Balears, con un aumentu del 14,9 por cientu; la Comunidad de Madrid, con un 9,1 por cientu; y Canarias, con un 8,4 por cientu, seríen les que más veríen aumentar la so población.

Anguaño residen nel país 1.018.775 persones, según les cifres de población provisionales del 2020, y nel 2035, de non camudar les tendencies, habría 917.339.