Asturies nun va reclamar los Archivos de Salamanca

Dende que la selmana pasada un comité d'espertos convocáu pol Ministeriu de Cultura reconociere'l derechu del Gobiernu catalán a la devolución de los documentos catalanes incautaos pol gobiernu franquista al acabar la Guerra Civil y que se guardaron n'Archivu de Salamanca, a lo llargo de tola selmana vienen sintiéndose voces en contra y a favor de la devolución de los documentos, ente les primeres la del historiador Paul Preston, biógrafu de Franco, que defendió la devolución d'unos archivos que pa elli son "botín de guerra, mientres que pela otra parte, el director de la Real Academia de la Historia, l'asturianu Gonzalo Anes, diz que ta contra la devolución de los papeles, en cuantes que los archivos formaos "han conservase y caltener la so unidá"

Tres el preste de la comisión d'espertos convocada pol Ministeriu de Cultura, que rexistró una mayoría absoluta de votos a favor y namás 3 abstenciones al pidimientu catalán, otres comunidaes autónomes pidieron que se faiga otru tanto colos sos documentos. Euskadi abrió una riestra de reclamaciones na que Valencia y Aragón puen ser les siguientes en reclamar, pero nun paez que les autoridaes asturianes tean pol llabor. El Director de promoción Cultural Carlos Madera declaró a la prensa qu'Asturies foi la primer comunidá en microfilmar archivos y que por ello, teniendo les copies, nun tien sentíu esparder los documentos orixinales peles comunidaes autónomes. Dende Izquierda Xunida tampoco nun hai intención de pidir los archivos, en cuantes que, según Noemí Martín, si los pidiéremos toos, ello desvirtuaría la esistencia del mesmu Archivu de Salamanca. El PP asturianu, pela so parte, ve que nun tien sentíu demandar los papeles de Salamanca pa crear 17 archivos distintos.

Según datos apurríos por Izquierda Asturiana (IAS) grupu que demandó al Principáu una actuación pa devolver la documentación a Asturies, la nuestra comunidá tien en Salamanca más de 742 caxes de documentos, muncho más que los catalanes, que tienen nel archivu salmantín dalgo más de 500 caxes