Asturies nun va facer otru trazáu pa l'alta tensión en Redes

El Principáu d'Asturies rechazó ayeri facer cambéu nengún nel trazáu de la llinia d'alta tensión Lada-Velilla al pasu de la mesma pel Parque Natural de Redes. De nada nun valieron les quexes y reclamaciones del Gobiernu de Castiella y Llión

El conseyeru d'Industria asturianu Graciano Torre declaró ayeri que-y abultaben "poco razonables" les crítiques al trazáu de la llinia que venía faciendo la conseyera de Mediu Ambiente de la comunidá vecina y atechóse nun informe de la UE pa defender que la llinia siga per au va. Según Torre, l'informe de la UE diz que fadría más dañu al mediu ambiente retirar les torretes que yá tan mangaes en Redes que dexales. Torre tamién sorrayó que'l trazáu Lada-Velilla ye "fundamental" p'asegurar el suministru de corriente n'Asturies y otres rexones españoles. El conseyeru d'Industria tamién reconoz que'l Principáu pue perder subvenciones importantes en casu de nun rematase la llinia.

Sobre'l tema de la llinia, l'alcalde socialista de Sobrescobiu Vicente Álvarez pidió l'otru día la implicación de tolos alcaldes del valle del Nalón na decisión que se vaya tomar "porque somos los más interesaos en protexer los nuestros espacios naturales". El proyectu d'Álvarez pasa per consiguir el soterramientu de la llinia al pasu pel Parque de Redes