Asturies nun va asumir hasta'l 2007 les competencies en materia de Xusticia

El conseyeru de Xusticia Javier García Valledor reconoció ayeri nel Parlamentu Asturianu que la comunidá autónoma asturiana nun va tar en condiciones de facese cargu de les competencies en materia de Xusticia hasta l'añu 2007. Retrásase asina cuasimente un añu sobre'l plazu estimáu la tresferencia de más importancia que-y quedaba por asumir a Asturies nel actual ciclu de desarrollu de la so autonomía.

Valledor aclarió que'l trespasu de la competencia va facese en dos fases, de manera qu'en primer llugar Asturies va asumir los medios materiales pa pasar darréu a xestionar al personal xudicial, una plantiya de cerca de 1.200 funcionarios. Según el conseyeru, esti ye'l modelu pol que se mandó esta mesma tresferencia n'otres comunidaes, casu de Madrid, el País Vascu o la Comunidá Valenciana.

Les perres siguen nel güeyu de la polémica negociación de la tresferencia, y ello ye que, anque la última ufierta del ministeriu que preside Juan Fernando López Aguilar allégase a los 32, 6 millones d'euros, Valledor, que dixo qu'Asturies nun cuenta con aceptar esa cifra y qu'aspira a más medios pa la xusticia asturiana, reconoció que de cualquier manera la tresferencia va suponer en llegándose al alcuerdu que se llegue"un esfuerzu más" pa los presupuestos asturianos.

El PP aprovechó'l reconocimientu d'esti nuevu retrasu pa echar pel executivu asturianu, calificando'l portavoz popular Reinerio Álvarez Saavedra a los responsables del procesu de "incapaces".

Amás de les competencies en materia de Xusticia, Asturies tien pendientes les tresferencies dende l'estáu en materia de cuenques hidrográfiques interiores y les de los ferrocarriles de vía estrencha.