Asturies nun crea empreses

Según el últimu estudiu del Ministeriu d´Economía sobre les pequeñes y medianes empreses (PYMES) Asturies ye l'autonomía onde se creen menos empreses nueves. Nel añu 2002 l'índiz de creación d'empreses xubió un 6,4% n'Asturies, mientres que la media del Estáu foi dell 13,66%. Otramiente, Asturies ye una de les autonomíes onde más baxa la rellación ente la cifra de negocios y la población: esactamente un 5,8%. Toa esta información recuéyese nel cartafueyu del ministeriu "Estadísticas PYME, evolución e indicadores".

Dende l'añu 1996 hasta primeros del 2002 el númberu d´empreses asturianes pasó de 59.429 a 63.212. Ello supón un crecimientu del 6,37% nel periodu, a razónn del 1, 06% al añu, mientres que nel restu del Estáu, el crecimientu mediu anual foi del 2,2% pal mesmu periodu. Una bultable diferencia orixinada por ser Asturies un país en declive pol procesu desindustrializador que se vive anguaño y tamién del pocu enfotu emprendedor qu'hai, daqué no qu'influyen distintos factores. De les 63.212 empreses contabilizaes, el 99,9% tienen menos de 249 trabayadores y el 90% de les empreses son microempreses de menos de 9 trabayadores. Los autónomos son el 53% del númberu total d'empreses, mientres que por estayes d'actividá el sector de la construcción y el de los servicios son los que más puxu tienen col 12,34% y el 80% respectivamente del total d´empreses nueves. La industria ocupa'l 6,93% mientres un marxinal 0,3% son pa empreses d´I+D. Les empreses asturianes representen el 2,3% del total de les empreses del Estáu.

Resultaos mui probetayos pa un país como Asturies qu'aspira a muncho más. Namás hai que oir falar al Presidente del Gobiernu Asturianu, Vicente Alvarez Areces, o a los dirixentes de la FADE que falen al altu la lleva del puxu que ta garrando la economía asturiana y del dinamismu empresarial qu'hai equí. La realidá, necia como ella sola, parez que sigue llevando-yos la contraria a los discursos oficiales, y énte la galbana en que vive la economía del país, la llave abierta de la emigración sigue separtando d'Asturies a la xeneración más preparada que nunca nun tuvo.