Asturies nun cacipla nel IRPF

El Gobiernu d´Asturies ye de los pocos Gobiernos Autonómicos que nun aprovecha la flesibilidá llexislativo na materia d´impuestos pa incluyir rebaxes fiscales a los contribuyentes. L'impuestu sobre la renta ye ún que les Comunidaes Autónomes puen cambiar pa meyorar la fiscalidá de dellos sectores sociales, pero Asturies nun fizo nengún cambéu nel IRPF del 2002 siendo xunta Cantabria, Andalucia y Canaries una de les poques comunidaes que quixeron más nun tocar nello. Normalmente, les partíes más afectaes poles deducciones fiscales qu'incluyen delles Comunidaes Autónomes son les deducciones por fíos y les deducciones por mercar la primer vivienda, anque tamién destaquen les rebaxes fiscales que suelen facese en delles CCAA pa discapacitaos y persones. Ente les comunidaes que suelen caciplar nel impuestu de la renta tan les Islles Baleares, que tienen por exemplu deducciones pa que les families merquen llibros de testu pa los fíos o la Comunidá Valenciana, que tien una deducción pal alquiler de vivienda.



Dientro del Estáu, Euskadi y Navarra tienen les sos propies Faciendes Publiques, que trabayen con tola llibertá esceptu nel impuestu del IVA, mientres que dientro de les comunidaes fiscalizaes pol estáu los contribuyentes d´Aragón, Extremadura y Castiella La Mancha estrenen per primer vegada esti añu deducciones autonómiques.

Otramiente l'impuestu de socesiones y donaciones ye ún del que va falase abondo. L'oxetivu de dellos gobiernos autonómicos ye desanicialu na práctica, y de fechu, les Faciendes Forales d´Euskadi y Navarra yá nun lu cobren. Esto quier dicir que nestes zones les herencies de pas a fios nun paguen porque tienen esención fiscal. N'otres comunidaes como Cantabria, l'impuestu tien una rebaxa del 99% pa herencies de pas a fíos y ente matrimonios, mientres que delles comunidaes autónomes como Galicia, Castiella y Llión o la Comunidá Valenciana tan plantegándose dir eliminando la mayor parte d´esti impuestu de forma progresiva. Nun fai falta dicir que n´Asturies nun se plantega facer nengún cambéu anque lo permita el marcu fiscal d´anguañu.




Cuando les competencies del Gobiernu d´Asturies yá son pequeñes, danse abondos casos como esti en que parez que nun se quieren exercer, y llama l'atención qu'un requexu de flesibilidá del sistema fiscal del Estáu nun s'aproveche en beneficiu de los contribuyentes. Deducciones empobinaes a la mocedá, a protexer el mediu ambiente, de sofitu de les families, a emprendedores, pa meyorar el accesu a la vivienda y o con oxetu social destinaes a sectores desfavorecios como les minoríes étniques o los discapacitaos namás son delles posibilidaes que tan ehí.