Asturies namás recupera’l 8% de los sos residuos

La prestixosa organización conservacionista Greenpeace presentó ayeri'l so informe añal sobre xestión de los residuos urbanos nel estáu. Acordies col informe de Greenpeace, que se fizo a partir de datos del añu 2003, Asturies incineraba o enterraba en vertederos el 91,9% de los sos residuos, un datu que lleva a afirmar a la organización que'l país "nun avanzó en polítiques de prevención y recicláu".

Según l'informe, Asturies xeneró nel añu 2003 485.147 tonelaes de residuos, de los que se recuperen el 8,09%, mientres que la media española de recuperación ta nel 11,5% . La organización diz que la situación amás va a peor en cuantes que se detecta una tendencia a xenerar cada añu más residuos, pasándose del kilu por habitante y día de va diez años a los 1,23 kilos del 2003. Con too y con ello, anque Asturies fai un 23% más de basura que nel añu 1996, lo cierto ye que la tendencia estatal a xenerar más basura foi muncho más acusada, xubiendo sobre'l 30% nesi mesmu plazu.

La organización camienta que ye "especialmente preocupante" la decisión del Gobiernu asturianu de facer una incineradora en Serín, y asegura qu'esta instalación va "bloquiar" l'avance hacia un sistema de xestión de los residuos urbanos afechiscu, amás de que "evidencia la falta de voluntá del Gobiernu asturianu de resolver los problemes sanitarios y mediuambientales que provoca la basura". Greenpeace asitia'l proyectu de la incineradora nun contestu más xeneral en que munchos poderes públicos vuelven a plantegar como una posibilidá real estes instalaciones que la organización refuga dafechu y que diz que yá s'echaron p'atrás a primeros de los noventa gracies a la refuga popular. Contra la incineración y los vertederos, Greenpeace defende que se faigan polítiques de "residuos cero" a parti del recicláu de los residuos orgánicos pa compost y el reeemplegu de los demás residuos. Como casos a imitar, Greenpeace presenta los d'Alemaña y Suiza, estaos que recuperen el 46% y el 53% de la so basura.