Asturies, n’alerta mariella por lluvies y tormentes hasta’l martes

El branu nun acaba de llegar a Asturies. Tres un mes de xunetu nel que’l sol fixo pocu actu de presencia, la entrada d’agostu vien acompañada de lluvies fuertes, según les predicciones. El país ta n’alerta mariella hasta’l martes.
 
Un embolsamientu d’aire frío procedente del Atlánticu va trayer lluvies fuertes, tormentes y un descensu de temperatures n’Asturies. L’Axencia Estatal de Meteoroloxía (Aemet) decretó pa güei l’alerta mariella –riesgu– por esti motivu nel nuesu país, Cantabria, Euskadi, Lleón, norte de Burgos, sierra de Madrid y Guadalajara, La Rioja, Cáceres y les vegues del Guadiana (Badajoz). Mentes, tán n’alerta naranxa –riesgu importante– les provincies d'Ávila, Burgos (meseta), Palencia, Salamanca, Segovia, Soria, Valladolid y Zamora.
 
Asina, esti llunes produciráse un aumentu de la nubosidá na Península dende'l suroeste y a lo llargo del día, con chubascos y nubes débiles a moderaes, sobre manera a partir de la tarde. Estes lluvies y nubes podríen ser fuertes o mui fuertes en puntos del cuadrante noroeste y zona centru, anque nun s'esperen precipitaciones nel área mediterránea. Per otru llau, les temperatures diurnes van esperimentar un descensu que va dir de lixeru a moderáu nel terciu oeste de la Península, área del Llevant y Canarias, siendo notable en medianíes del archipiélagu. Los rexistros van subir de lixera a moderáu nel Cantábricu oriental y Illes Balears, y van caltenese ensin cambios significativos nel restu. Pela so parte, les temperatures nocherniegues van ser más altes na metá norte peninsular. A lo último, los vientos van soplar ruinos a moderaos, predominando la componente norte en Galicia, los del oeste nel suroeste peninsular y los del sureste na área mediterránea. En Canarias espérase que les rabaseres sían moderaes del norte y con algún intervalu fuerte.
 
Pa mañana l’alerta mariella va mantenese n’Asturies, Cantabria, Euskadi, Lleón y Burgos, y va establecese en Palencia y na montaña de Lugo y Ourense. Nesta época vacacional de numberosos desplazamientos per carretera, ruégase precaución a los conductores que van circular poles zones afectaes pol mal tiempu güei y mañana.