Asturies llevó 5 de los 14 premios del VIII SISGA

|
Xuráu del VIII SISGA

Tamién sumó seis segundos y seis terceros puestos nel certame que contó con presencia de 100 sidres de gala de trés continentes.

Los productos asturianos sumaron un total de 17 reconocimientos nel VIII Salón Internacional de les Sidres de Gala (SISGA), eventu entamáu pola Fundación Asturies XXI celebráu esta fin de selmana en Xixón, de los que cinco foron primeros premios. Les sidres Diamantes de Hielo de Viuda de Angelón (Sidra de Xelu), Salvador del Obispo de Casería San Juan del Obispo (Aguardiente de Sidra), The Pippa Cocktail de manzana al vermú de The Pippa (Cóctel de Sidra), Roxmut de Castañón (Vermú de Sidra) y Caldea de Panizales (Sidra de Fueu) ganaron na so respeutiva categoría.

El xuráu internacional tuvo conformado por Ricardo del Río y Javier Canal, d'Asturies; Hajji Moez, Gauthrine Christine, Tulasne Gregoire, Clement Lhommeau y Eric Sala, de Francia; Eli Cayer y Ryan Burk d'Estaos Xuníos; Joseph Barfeld, de Portugal y Estaos Xuníos; Māris Plūme, de Letonia; Stefan Heine, d'Alemaña; Felix Nash y Allen Hogan, de Reinu Xuníu; Herminio Carral, de Lleón; Petri Halmetoja de Finlandia; Arjen Meeuwsen, de los Países Baxos; y Luis Ravina, de Canarias. Euskadi, Alemaña, Letonia, Francia, Países Baxos, Italia, Finlandia y Reinu Xuníu son los países que llevaron dalgún reconocimientu.

Les prebes celebráronse la mañana del vienres nel Llagar Castañón y la entrega de premios pela nueche mientres la cena de gala entamada nel Bellavista, con presencia d'autoridaes. El sábadu tuvo llugar la preba abierta al públicu nel Palaciu de Revillagigedo y el domingu, la xornada de sommeliers n'El Duque.

Contador Estadistiques