Asturies lidera la xuba del paru en setiembre

Los conceyos turísiticos sufren los mayores aumentos pol fin del periodu estival.

Asturies foi'l territoriu, xunto con Melilla y Ceuta, onde más medró'l paru en setiembre, un 4,33 por cientu por un 7,46 y un 4,92 de les ciudaes autónomes, de manera respeutiva. La media estatal asitióse nun 0,60 por cientu.

Per segundu mes medra'l paru nel país, en concreto en 2.565 persones, pa poner el total en 61.789, que ye, sicasí, la cantidá más baxa pa setiembre dende'l 2008. La finalización de los contratos venceyaos al sector turísticu provoca esti aumentu, hasta'l puntu de que 8 de cada 10 inscritos nuevos nes oficines del Serviciu Públicu d'Emplegu Estatal (SEPE) son trabayadores del mesmu.

Asina, los conceyos con más visitantes lideraron en términos porcentuales la xuba del paru en setiembre, con tases mui superiores a la media nacional, como ye'l casu de Ribedeva (41,30 por cientu), Onís (40,91), Ribeseya (34,04) o Llanes (22,80) por cientu, mentes que, pal occidente, en Valdés medró un 15,04 por cientu.

A nivel estatal, el desemplegu creció en 17.679 persones hasta algamar 2.941.919 paraos. Namái baxaron les cifres en La Rioja (5,16 por cientu), Euskadi (1,83), Canarias (0,86), Comunitat Valenciana (0,35) y la Comunidad de Madrid (0,04).

18 meses de baxada interañal

El país acumula 18 meses de baxada interañal. En setiembre foi de 2.419 persones, un 3,77 por cientu, menor que nel Estáu, que foi del 9,70 por cientu, una mengua de 315.883 demandantes d'emplegu.

Illes Balears (25,22 por cientu), Comunidad de Madrid (23,88) y la Comunitat Valenciana (16,87) presenten les meyores cifres, mentes que namái aumenta'l paru interañal nes ciudaes autónomes: en Melilla un 10,17 por cientu y en Ceuta un 0,78. Murcia y Andalucía son les úniques comunidaes con una baxada menor qu'Asturies, del 0,21 y del 2,69 por cientu, de manera respeutiva.

Aumenten les contrataciones y baxa l'afiliación

La contratación aumentó en setiembre, sobre manera la de calter indefiníu. Asina rexistráronse 24.044 contratos, 893 más qu'en agostu, de los que 9.104 foron fixos.

Por contra, baxó l'afiliación a la Seguridá Social en 6.060 persones, polo que'l total queda en 372.817.