Asturies, la economía más feble de la España de les autonomíes

El debate electoral d'esta selmana organizose alredor d'un documentu del Institutu d'Estudios Económicos de Madrid en que s'analizaba la evolución económica de les autonomíes españoles dende la transición hasta l'actualidá. Nesti estudiu, qu'agora yá ta n'internet, Asturies ye, xunta Euskadi, l'autonomía que peor lo lleva de va 25 años p'acá en tolos indicadores económicos qu'espeya l'estudiu.

El que l'estudiu saliere d'una institución venceyada a la CEOE y qu'entrare n'escena metanes la campaña electoral llevó a estremaes interpretaciones polítiques del documentu dende tolos colores del arcu la vieya políticu astur. Pero anque delles afirmaciones del estudiu semeyen parciales, como cuando diz que la creación d'emplegu a partir de 1.996 (añu del trunfu del PP) rescampla col parón de los venti años anteriores, el valir de dellos datos abulta indiscutible. Primero de too, l'estudiu diz que, contra una media estatal de xuba del PIB del 2,7% añal, el PIB astur namás xubió'l 1,49%. En cuantes al valor añadíu de la producción asturiana, la cosa foi entovía peor, ya que'l VAB astur foi del 45% de la media española, el datu más baxu con diferiencia sobre'l segundu más baxu, que foi l'euskaldún (61,3%).