Asturies, la comunidá autónoma que más población perdió nel 2004

Asturies y Galicia son les dos úniques comunidaes autónomes (sacantes Ceuta y Melilla) que perdieron población a lo llargo del añu 2003, un periodu en que l'estáu censó en conxuntu más de mediu millón d'habitantes nuevos.

Según les cifres de la revisión del Padrón Municipal, con fecha del 1 de xineru del 2004 que'l Conseyu de Ministros declaró güei oficiales , Asturies tenía un total de 1.073.761 habitantes censaos, ello ye, 1.620 menos que l'añu anterior, lo que supón una perda de población del 0,15 por cientu.

Mientres Asturies perdía esos 1.620 habitantes, el conxuntu del estáu pasaba per primer vegada de los 43 millones d'habitantes, rexistrando una xuba de cerca de mediu millón nun añu. España va entamar asina l'añu 2.005 con una cifra oficial de 43.197.684 habitantes, 480.620 más respective al añu anterior (1,13%).

Xunta Asturies, Galicia sufre una perda de población, pero muncho más suave, quedando con 109 habitantes menos que l'añu anterior. Per otra parte, toles demás CCAA xuben de población, rescamplando les xubes porcentuales de La Rioja y Murcia, que pasen del +2% y la xuba en términos absolutos de Cataluña, que rexistra 109.173 habitantes más respective al padrón oficial del añu anterior.

Con estos datos, Asturies pierde población en términos absolutos y los asturianos pasamos tamién a ocupar un llugar más pequeñu dientro del conxuntu del estáu. Si nel actual padrón la población d'Asturies supón 'l 2,51% del total d'España, el censu del 2005 déxanos nel 2,48%.