Asturies ganó a Escocia en voleibol

La selección asturiana femenina de voleibol ganó con facilidá a Escocia nel partíu internacional que se xugó ayeri en Pabellón de Deportes de l'Arena de Xixón nel únicu partíu de les selecciones asturianes pa esti añu.

La gaita asturiana y la escocesa, en manes d'Hugo Noval y F. Warren, respectivamente, abrieron colos respectivos himnos l'actu del únicu partíu oficial de les selecciones asturianes pa estes navidaes. El Pabellón de Deportes de l'Arena de Xixón, un recintu pequeñu pero mui afayadizu pa los equipos locales, que tienen siempre al públicu mui cerca xugando ellí, llenóse con más de 2.000 persones pa contemplar un partíu que foi mui fácil pa les asturianes. Contra un equipu escocés que carecía d'esperiencia, Asturies ganó los trés sets, resolviendo'l partíu enteru en menos d'una hora real de xuegu y saliendo yá de mano con un parcial de 7-0 que desfizo toles duldes, dexando'l marcador final en 25-11, 25- y 25-15,. Ello teniendo en cuenta que l'equipu de Jose Castro fizo tolos cambeos posibles, saliendo toles xugadores sacantes Noelia Sánchez por lesión. Ver equí el reportaxe fotográficu del partíu

Amás del partíu de voleibol ente Asturies y Escocia, el día d'ayeri celebráronse bien d'alcuentros ente selecciones autonómiques y rivales estranxeros de mayor o menor categoría. El más importante foi'l de Cataluña, qu'enllenó'l Nou Camp pa un alcuentru de fútbol cola Arxentina. El partíu tuvo un ambiente d'auténtica competición y tamién de reivindicación, lleéndose nún de los fondos del estadiu del Barça una pancarta de grandes dimensiones col escritu "Cataluña nun ye España". Arxentina, que contó col sofitu de bien de los sos compatriotes, ganó con un marcador de 0-3, dempués de que fuera del estadiu, una manifestación de cerca de venti mil persones reivindicare'l derechu de les selecciones catalanes a dir a campeonatos oficiales. (Más información en Vilaweb)

D'otra manera, el restu de selecciones autonómiques que xugaron estes navidaes ficiéronlo toes en fútbol masculín. Valencia xugó con Bulgaria en Mestalla (1-2 pa los visitantes), Euskadi enfrentóse a Honduras (2-0 pa los vascos con tantos de Fran y Yeste) y Navarra a Marruecos (2-1 pa Navarra en El Sadar con goles de Nagore y De Carlos), mientres qu'Andalucía empató a cero con Malta nel Sanchez Pizjuan.