Asturies, Galicia, Castilla y Lleón, y Estremadura, úniques autonomíes que pierden población

|
Maleta

El noroeste peninsular y Estremadura, amás de les ciudaes autónomes, son les úniques zones del Estáu que pierden población. L’Instituto Nacional de Estadística (INE) espublizó’l miércoles los datos correspondientes al primer semestre del 2019, periodo nel qu’Asturies rexistró 2.212 habitantes menos.

En términos relativos, Asturies ye la segunda autonomía que más población perdió nel periodu que va del 1 de xineru al 1 de xunetu del añu pasáu, un 0,22 por cientu, namái superada por Estremadura (0,25 por cientu), amás de Ceuta (0,47) y Melilla (0,48). Asina, nos últimos datos conocíos, el país suma un total de 1.019.993 habitantes.

Si miramos los d’hai 10 años, Asturies perdió 56.437 ciudadanos nuna década nuna pinga continua provocada por un crecimientu vexetativu negativu nel que les muertes lleguen a doblar a los nacimientos, y la emigración. Nesi periodu namái se rexistró un aumentu nel segundu semestre del 2009, puntu dende’l que’l descensu foi imparable.

Los otros dos territorios que rexistren datos negativos son Castilla y Lleón, con un descensu el 0,22 por cientu y Galicia, con un 0,06. La media estatal total ye positiva, con una medra del 0,35, asitiando’l total de población d’España en 47.100.396 habitantes, con Illes Balears (0,87 por cientu), Comunidad de Madrid (0,66) y Canarias (0,61) como les autonomíes con meyores cifres.

Aumenten los migrantes n’Asturies

La perda de población n’Asturies nesti periodu amenorgóse pol aumentu de la llegada d’inmigrantes al país. 3.494 persones procedentes d’otros llugares establecieron el so domiciliu equí, de los que 2.834 nun tienen nacionalidá española, siendo ésta la cifra más alta dende’l 2008.

D’ellos, la mayor parte son venezolanos (474), siguíos de Colombia (451), Cuba (154), Marruecos (146) y Rumanía (107). D’ellos, la mayor parte son venezolanos (474), siguíos de Colombia (451), Cuba (154), Marruecos (146) y Rumanía (107). Otra manera, d’Asturies salieron 1.335 a otros estaos, mentes que 3.497 persones colaron a otres autonomíes, siendo 3.273 los que llegaron al país d’otres comunidaes, lo que significa una perda interna de 224 habitantes.

Contador Estadistiques