Asturies festexa’l XLV Día de les Lletres Asturianes

Esti vienres celébrase’l XLV Día de les Lletres Asturianes, que tien como actu principal la xunta estraordinaria de l’Academia de la Llingua Asturiana (ALLA) nel Campoamor. Mediu centenar de llibreríes faen un 10 por cientu de descuentu pola compra de llibros o discos n’asturianu, amás de regalar el llibru conmemorativu.

L’asturianu y el gallego-asturiano viven güei una xornada especial. Asturies festexa’l Día de les Lletres Asturianes que completa una Selmana de les Lletres Asturianes dedicada a Conceyu Bable nel cincuentenu aniversariu de la so funcación.

L’actu central ye la xunta estraordinaria de l’ALLA n’Uviéu a les 19 hores, con apertura de puertes del Campoamor a les 18.30 hores. El discursu de Xosé Antón González Riaño confírmase un añu más como’l momentu más esperáu d’un actu nel que’l presidente va compartir protagonismu con Claudia Elena Menéndez Fernández y Pablo Rodríguez Medina, escoyíos académicos de númberu nuna sesión na que se nomó tamién a la suiza Éva Büchi académica d’honor.

El pieslle musical nesta ocasión va correr a cargu d’Héctor Braga, que va presentar dellos cantares del so espectáculu nuevu, de nome ‘Rabil’. Amás van lleese poemes del númberu 40 de la revista ‘Lliteratura’, que ta acabante de salir.

L’actu, con entrada llibre, va poder siguise en direuto per TPA. Según apunten dende l’ALLA, “l’alcordanza de la entidá considerada madre del asturianismu modernu va tar mui presente nesta cita coleutiva cola reivindiciación, la dignificación y la celebración llingüística”, en referencia a Conceyu Bable.

Ente otres autoridaes, ta confirmada l’asistencia del presidente Adrián Barbón; de la conseyera de Cultura, Política Llingüística y Deporte, Ana Vanessa Gutiérrez; de la conseyera d’Educación, Lydia Espina; y del direutor xeneral d’Aición Cultural y Normalización Llingüística, Antón García.

‘Conceyu Bable. El frutu y la semiente’ y ‘Dedín, dedín...’

Con motivu del Día de les Lletres Asturianes, como ye vezu, les llibreríes asturianes presenten un 10 por cientu de descuentu cola compra de llibros o discos n’asturianu o gallego-asturiano. Amás, va entregase de baldre’l conmemorativu d’esta edición de la Selmana de les Lletres Asturianes ‘Conceyu Bable. El frutu y la semiente’, coordináu por Francisco ‘Paco’ Álvarez, o la obra infantil ‘Dedín, dedín...’, de Belén Rico, nel casu de llingua del Eo-Navia.

Les llibreríes participantes nesta ocasión son les siguientes:

• Uviéu: Aldaba Regalos, Aldebarán, Antares, Casa del Libro (tamién gallego-asturiano), Cervantes (tamién gallego-asturiano), Chemi, Diocesana, Elías, Esfera, Garluc, Hangar Rebelde, Maribel, Matadero Uno, Pasa Página, Puntos, San Pablo y Trabe (tamién en gallego-asturiano).
• Xixón: Acuarel, Amez, De Bolsillo, La Buena Letra, Central, Clarín, Gizzmo Cómics, La Habitación Propia, La Madriguera, Paradiso, La Quince, La Revoltosa, Roy, Mundo Sonoro y Musicasturiana.com.
• Avilés: Casona, Clarín, La Crisálida, Víctor Núñez, Elepé Producciones y ‘Avilés, ¡Qué Guapina Yes!’.
• Mieres: Disco 55, La Llocura, La Pilarica y La Torre.
• A Veiga: Casa Pérez, Patefa y San Pedro.
• Siero: Fnac, La Chimenea y Naredo.
• Cangas del Narcea: Treito.
• El Franco: Alfonso.
• Grau: Las Dos Vías.
• Llaviana: Arvin.
• Noreña: La Semeya.
• Parres: Gestión.
• Piloña: Rima.
• Samartín del Rei Aurelio: Sol.

Esposición nel Archivu Históricu d’Asturies

Nesta xornada tamién s’inauguró la tercera de les trés esposiciones de la XLV Selmana de les Lletres Asturianes. Trátase de ‘Conceyu Bable nel so tiempu. L’Asturies de va mediu sieglu’, que se va poder visitar nel Archivu Históricu d’Asturies hasta’l mes próximu.

Nella’l visitante va atopar paneles informativos y vitrines con información y oxetos dende l’añu de fundación de Conceyu Bable, 1974, hasta los primeros años de los 80, recoyendo lo que foi’l procesu autonomista d’Asturies, tanto alredor de la organización como d’otros ámbitos. Pa ello fíxose usu principalmente de dos fondos documentales, el del Gobiernu Civil y el del MC.

Na semeya, parte de la esposición ‘Conceyu Bable nel so tiempu. L’Asturies de va mediu sieglu’, inaugurada esta mañana.