Asturies Feminista 8M lleva la manifestación d'esti añu a Mieres

El lema va ser 'Compañera, dame tira'.

Dende l'entamu d'esti añu Asturies Feminista 8M vien celebrando asamblees pa preparar Día Internacional de les Muyeres, que se conmemora'l 8 de marzu. La gran movilización llévase esti añu a Mieres, colo que ye la primer vegada que'l movimientu feminista sal de les grandes ciudaes del país pa celebrar l'actu reivindicativu central, previstu pa les 19 hores dende'l Pozu Barreo.

Un sitiu mui especial, na cuenca d'El Caudal, que llleva a escoyer pa esta ocasión un lema de nidiu sabor mineru: 'Compañera, dame tira'. "Ye una espresión qu'habitualmente s'usa en masculín y que se tresforma al femenín dando-y más fuerza al significáu de xunión, trabayu n'equipu, sofitu, llucha, sororidá, compartir..., porque na llucha feminista toes damos tira", espliquen.

Preparativos

Hasta'l 8-M tán previstes aiciones en dellos conceyos del país. Asina, esti vienres nel mesmu Mieres va celebrase'l 'Perres: folixa feminista collaborativa', un eventu llúdicu y cultural nel que Les Greques van animar con música un bingu con premios aportaos por TC28, Aturruta, Naturaller, Old Skulls Tattoo, Jessica Barredo, Puru Remangu, Algaire y El Baúl de Güelita.

Amás va haber un sortéu de llibros feministes cedíos por Hoja de Lata, La Fabriquina y el Instituto de la Mujer, y va tocar Silvidos y Gemidos. La cita va principiar a les 20 hores nel Casinu de Mieres, con un donativu de 10 euros p'acceder.

Al día siguiente va desendolcase dende les 11.30 hores nel llocal Cambalache d'Uviéu la tercer asamblea nacional d'Asturies Feminista 8M pa siguir preparando la organización del 8-M. Yá'l domingu, organízase n'El Tenderete de Cabrales dende'l meudía el 'Domingas Fest', mercáu pa poner en valor productos llocales y artesanos. 

Completa la programación confirmada hasta'l momentu un Pasucais Feministes per La Pola Siero coincidiendo col Xueves de Comadres con salida a les 19 hores de la plaza de la Casa Conceyu.