Asturies, ensin Tribunal de la Competencia

Anque'l Tribunal Constitucional del Estáu dexó claro que yera posible que les comunidaes autónomes crearen los sos propios tribunales de la competencia, Asturies nun tien nengún órganu que controle la competencia. El casu ye que por llei, les distintes comunidaes autónomes pueden tener un serviciu regulador de la competencia asemeyáu al Tribunal de la Competencia del Estáu. Anguaño sólo Cataluña dispón d'esti organismu qu'entamó a furrular n'avientu del 2002. D'entós p'acá'l tribunal catalán recibió 25 denuncies, desendolcando dos más d'oficiu y tien 27 espedientes en cursu. Un exemplu p'Asturies de la viabilidá y necesidá d'un serviciu tan importante pa la supervisión del mercáu asturianu.

Un tribunal de la competencia ye una garantía pa los consumidores y un órganu mui afayadizu pa controlar a les empreses. Dempués de la positiva esperiencia catalana, comunidaes como la de Madrid o Galicia ya tan trabayando nesi sentíu. De fechu, Madrid ya tien creáu un Serviciu de Defensa de la Competencia y ta nel procesu de formación del personal pa entamar a trabayar con ello en pocu tiempu. En Galicia l'executivu ta tramitando la llei que va regular estiórganu, y nesti procesu llexislativu tamién tan les comunidaes d'Euskadi y Murcia, onde los gobiernos tan preparando los respectivos decretos reguladores. Andalucía tamién dio anuncia de que cuenta con crear el so propiu tribunal de la compentencia anque parez que puede quedar pa práu en función de los resultaos electorales de les elecciones andaluces d'esti añu, mientres que Canaries quier entamar esti añu a facer estudios sobre la posible creación d'un tribunal d'esti tipu nes isles. N'Asturies de momentu'l Gobiernu nun amosó nengún interés en crear esti órganu que controle a les empreses, sofite a los consumidores y garantice la llibre y sana competencia y qu'ayudaría a caltener una mínima tresparencia de los mercaos