Asturies encara la ‘normalidá nueva’ con un llamáu a la prudencia

A la medianueche del sábadu va finar l’estáu d’alarma vixente dende’l 14 de marzu y Asturies va entrar na ‘normalidá nueva’ hasta la llegada d’una vacuna o un tratamientu eficaz contra la COVID-19. El presidente Adrián Barbón llama a los asturianos a afrontala con “prudencia” y “responsabilidá” pola presencia del coronavirus.

La fin del estáu d’alarma va provocar la llegada de persones procedentes de llugares nuna peor situación epidemiolóxica, dalgo que se criticó nes selmanes últimes dende Asturies. Barbón defendió’l sábadu una prórroga nueva “non pa toles comunidaes” y culpó d’esta situación “a la tensión y alderique partidista col que s’afronta esti tema” en Madrid.

La falta de competencies pa restrinxir la movilidá va provocar que’l país, ensin contaxos el martes y el miércoles, s’arriesgue a l’apaición de biltos nuevos del coronavirus SARS-CoV-2. Por ello, esta mañana, el presidente pidió “a tolos asturianos y asturianes” na inauguración de la esposición ‘Orlando Pelayo, exiliu y memoria’ nel Muséu de Belles Artes d’Asturies qu’afronte la ‘normalidá nueva’ “como fiximos hasta agora: cola responsabilidá y la prudencia a las que nos obliga la certidume de que l’enemigu, la COVID-19, entovía ta ehí”.

Apertura de la movilidá ente Cantabria y Euskadi

Cantabria y Euskadi adelantaron dos díes l’apertura de la movilidá ente les dos autonomíes tres abandonar l’estáu d’alarma, al igual que Catalunya. El llunes Galicia convirtióse na primera comunidá en facelo, mentes qu’Asturies apostó por escosar los plazos “en defensa de la salú pública”.

El Gobiernu tien convocáu un Conseyu de Gobiernu pa esta tarde na que va aprobar el decretu que regule la ‘normalidá nueva’.

Semeya obra d'Armando Álvarez.