Asturies empieza l’añu superando la cifra de 90.000 paraos

90.537. Ésti ye’l númberu de paraos esistente nel país tres sumase n’avientu 1.684 persones nueves a la llista de desemplegaos. Trátase de la cifra más alta dende l’añu 1996, cuando entama la serie histórica comparable.
 
Esti aumentu nel mes caberu del 2011 foi del 1,90 por cientu, la cuarta más alta del Estáu xunto con Aragón y tres La Rioja (3,34 por cientu), Castilla y Lleón y Navarra (2,41 por cientu), tando la media estatal nun 0,04 por cientu al sumar 1.897 paraos más. Onde más baxen los rexistros ye en Ceuta (-4,66 por cientu), Melilla (-2,47 por cientu) y Andalucía (-1,36 por cientu).
 
En términos añales, l’incrementu n’Asturies ye casi cuatro puntos superior al rexistráu nel Estáu, onde’l paru aumentó un 7,86 por cientu al contabilizase a 322.286 persones más ensin trabayu, colo que la cifra global escala hasta los 4.422.359 paraos, el nivel añal más altu en tola serie histórica, según los datos del Ministerio de Emplegu y Seguridá Social. El 2011 dexó nel país 9.338 parados más, lo que supón una xuba del 11,50 por cientu con respeuto al 2010.
 
La medra del desemplegu esti añu pasáu ye la quinta mayor del Estáu per detrás de Ceuta (19,63 por cientu), La Rioja (13,28 por cientu), Extremadura (12,93 por cientu) y Cantabria (11,59 por cientu). Los territorios con meyores resultaos son Canarias (4,30 por cientu), Melilla (4,48 por cientu) y Madrid (5,80 por cientu).