Asturies, destín cultural preferíu del turista español

Un informe del Ministeriu de Cultura que recueye los principales datos sobre la industria cultural n'España asitia la nuestra comunidá autónoma como'l destín preferíu del turista español cuando se trata de facer un viaxe por interés cultural. Nel estudiu, qu'emplega datos del quinqueniu 2000-2005 rescampla que'l 18% de los viaxes que se fixeron a Asturies dende otres comunidaes nel añu 2004 foron por esta razón, cinco puntos y mediu penriba de la media estatal, mientres que la comunidá que menos llamó l'atención por cuestiones rellacionaes cola cultura foi Murcia, onde namás foron un 6% de los desplazamientos culturales.

Anque'l resume estadísticu del Ministeriu nun asoleya'l gastu de los "turistes culturales" nel nuestru país, si que s'espeya nelli'l gastu en cultura de los asturianos, que foi nel 2004 de 238,9 euros por persona, 15 euros penriba de la media estatal. L'informe tampoco nun estrema per comunidaes les magnitúes de la industria cultural española, pero espeya'l sector como una estaya de la economía estatal qu'espoxiga y que supón el 2,8% del emplegu n'España.