Asturies conviértese na autonomía con mayor descensu del paru en xunu

|
Llastres dende la mar

El paru n’Asturies baxó en 2.870 persones en xunu, convirtiéndose’l país na autonomía que rexistró un mayor descensu, un 3,42 por cientu, cuando la media estatal foi un aumentu del 0,13 por cientu. Les meyores baxaes diéronse nos conceyos más turísticos, como Colunga (18,66 por cientu) o Llanes (17,88 por cientu).

La tendencia de mayu, cuando hebo 67 solicitantes más d’emplegu, tres dos meses catastróficos de destrucción de puestos de trabayu pola pandemia de COVID-19, confirmóse en xunu. El paru baxó en cuasi 3.000 persones, pa poner el total en 80.990, con Asturies como’l territoriu con un mayor descensu.

Galicia, con un 3,36 por cientu, y Castilla-La Mancha, con 3,20 por cientu, rexistren unos datos asemeyaos al nuesu país. Mentes, les peores cifres danse na Comunitat Valenciana, onde’l paru medra un 3,70 por cientu, Euskadi (1,93 por cientu) y Murcia (1,54), aumentando globalmente’l desemplegu nel Estáu en 5.107 pa poner el total en 3.862.883.

Los conceyos turísticos son los que más ven baxar el desemplegu, casu de Colunga (18,66 por cientu), Llanes (17,88 por cientu), Cabrales (16,65 por cientu), Onís (13,33 por cientu) y Cangues d’Onís (10,81 por cientu). Mentes, los cuatro conceyos de más población tamién ameyoren les cifres con respeuto a mayu: Siero (3,98 por cientu), Xixón (3,86 por cientu), Avilés (3,56 por cientu) y Uviéu (2,10 por cientu).

Males cifres interañales

Magar esta recuperación, si miramos les cifres interñales l’aumentu del paru ye considerable. Nel casu d’Asturies asítiase nel 19,94 por cientu, con 13.464 desemplegaos más, siendo la media estatal del 28,09 por cientu (847.197 persones).

Illes Balears, con un contundente 104,26 por cientu, tien los peores datos, siendo Catalunya, con un 35,76 por cientu, y Navarra, con 33,21 por cientu, les siguientes de la llista. Los datos más baxos son los de les dos ciudaes autónomes y Castilla-La Mancha (14,94 por cientu) y Estremaúra (17,90 por cientu).

El país recupera 2.614 cotizantes

Nos trenta díes últimos la contratación aumentó n’Asturies un 85,53 por cientu al rexistrase 18.755 contratos, 8.646 más qu’en mayu, mientras que la Seguridá Social ganó 2.614 cotizantes (0,75 por cientu) hasta asitiar la cifra total d’afiliaciones en 353.225 persones. Amás, 21.810 trabayadores dexaron de tar afeutaos por regulaciones d’emplegu.

Na imaxe, Llastres, población del conceyu de Colunga y ún de los atractivos turísticos principales del país. Semeya obra de Gun Powder Ma baxo llicencia CC BY-SA 3.0.

AdxuntuTamañu
PDF icon Datos del paru xunu 20201.89 MB
Contador Estadistiques