Asturies celebra San Xuan

Cientes de fogueres van prender n’Asturies esta medianueche pa celebrar San Xuan. La nueche más máxica del añu trai un abanicu grande d’opciones per tol país.

La mayoría de ciudaes y pueblos –al igual que munchos munchos barrios– d’Asturies tienen preparaes pa esta nueche fogueres pa celebrar el solsticiu de branu –realmente foi’l día 20, pero la Ilesia católica treslladó esta celebración pagana pa coincir con San Xuan Bautista– y quemar los augurios malos.

Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía ta mui viva nel país. Amás ye l’únicu momentu d’atopar la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

La foguera más multitudinaria ye la qu’entama’l Conceyu de Xixón na sablera d’El Natahoyo, qu’esti añu va contar cola presencia de Cerezal. La celebración principia a les 21 hores col enrramáu de la fonte de Pelayo por parte d’Andecha de Cultura Tradiciona Na Señardá. Una hora más tarde, la Banda Gaites Villa de Xixón va actuar nos Xardinos de la Reina y la Banda Gaites Noega, na plaza Italia, pa depués continuar la folixa na playa urbana xixonesa. A la medianueche, tres el prendíu de la foguera, la danza prima y el llanzamientu de fueos artificiales, va actuar el grupu mierense. Otros barrios de la ciudá, como Ciares o La Calzada en L’Arbeyal, tamién celebren esta nueche máxica nun ambiente más vecinal.

Una cita con gran tradición ye de la Corvera, en Tresona. La folixa va principiar a les 22 hores cola actuación d’Anabel Santiago, pa depués dar pasu a un espectáculu de Producciones Nun Tris, de nome ‘El ramu, que va axuntar baille, música y pirotecnia. Tres el prendíu d’una foguera especial a medianueche, la celebración va continuar con un conciertu de Tejedor y otru de Xera. La nomada ‘Foguera d’Asturies’ va pesllar con música electrónica.

Tanto esta folixa, como la de Mieres, van protagonizar l’especial de San Xuan de TPA, que va principiar a les 23.15 hores.

Novedaes n’Uviéu

Uviéu va vivir novedaes nesta Nueche de San Xuan. La primera ye la recuperación de la foguera na plaza de la Catedral, onde a les 23.30 hores Teatro Margen va representa ‘Hechizo en la Noche de San Juan’. Otra son les fiestes populares del Antiguo entamaes por dellos llocales y coleutivos del barriu, como Partycipa, L’Arcu La Vieya, Cambalache, Oviedo Redondo, Paraíso y La Llegra. Nesti casu l’actividá va principiar a les 18 hores nel prau asitiáu tres La Casona La Rega.

Na cuenca del Nalón hai celebración especial en L’Entregu. El Centru Social Autoxestionáu La Semiente entamar por quintu añu nel prau xuntu al campu de fútbol Nuevu Nalón una folixa solidaria, centrada nesta ocasión na ‘Llei Mordaza’, que va principiar pela mañana col engalanamientu de les fontes del pueblu y d’otros puntos del conceyu. A les 23 hores va continuar la celebración con una queimada de baldre pa tol mundu, que tamién va poder consumir nun chigrín y participar en delles actividaes, como’l conxuru contra la crisis previstu a medianueche.

Nava revitaliza’l so San Xuan faciéndolu coincidir coles III Xornaes de Música Tradicional na plaza Manuel Uría. Asina, a les 19 hores va celebrase’l III Festival de Bandes de Gaites LaKadarma, nel que van participación la Banda de Gaites El Gumial (Ayer), la Banda de Gaites Castrillón y la Banda de Gaites Noega (Xixón), amás de l’agrupación llocal. Yá de nueche, a les 22.30 hores van actuar los escoceses MacLeod! y, tres la quema de la foguera, Llan de Cubel.

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los sueños’. Ésti ayudará a los más pequeños de la casa a comprender meyor les razones d'esta celebración tan prestosa.