Asturies carez d'una "sobreufierta" d'universitarios según Riopedre

El yá famosu "informe Lorences" sobre la colocación llaboral de los universitarios asturianos, que dio llugar a les declaraciones del presidente Álvarez Areces nes que calificaba la marcha de llicenciaos a trabayar fuera d'Asturies de "lleenda urbana" dio ayeri pa nueves declaraciones con motivu de la presentación pública del llibru que ta acabante d'editar la Conseyería d'Economía colos datos del informe. Ellí tuvieron el Rector de la Universidá Juan Vázquez y los conseyeros d'educación Iglesias Riopedre, d'Economía Jaime Rabanal y d'emplegu Graciano Torre.

Tolos asistentes al actu concueyaron en quitá-y fierru a la idea de la fuga de celebros d'Asturies y tuvieron d'alcuerdu na seriedá y rigor del informe, pero ente los distintos argumentos que s'espusieron hebo un requexu pa interpretaciones distintes al discursu monolíticu d'Areces la otra selmana cuando declaró que la marcha de llicenciaos d'Asturies nun yera otro qu'una "lleenda urbana". Asina, el Conseyeru d'Educación José Luis Iglesias Riopedre defendió la idea de qu'esiste una "sobreufierta" d'universitarios. Según Riopedre "Asturies ye la rexón qu'ocupa'l primer llugar por númberu d'alumnos ente los 16 y los 24 años, ello quier dicir que tenemos un gran númberu d'universitarios, y la xente tien de saber qu'hai titulaciones que-yos permiten emplegase n'Asturies y otres que non"

Graciano Torre, titular d'emplegu, pidió "rigor" a la hora d'interpretar l'informe Lorences y tamién que "nun se xuegue colos sentimientos d'estos emigrantes y de les sos families". El conseyeru reclamó que nun se faiga demagoxa y dixo que l'estudiu de Lorences quitába-y seriedá a la famosa cifra qu'asoleyare nel so día'l sindicatu CCOO qu'afirmaba que yeren 18.000 los asturianos que tuvieron qu'emigrar nos últimos años. El rector Juan Vázquez pela so parte tamién reconoció que la salida de titulaos de la universidá nun concasaba col so enxertamientu en mercáu llaboral y echó-y la culpa d'ello a la incapacidá del sistema productivu p'asimilalos, reclamándo-y al Principáu planes especiales d'emplegu pa los sos alumnos.

El conseyeru d'economía Jaime Rabanal foi'l menos críticu cola situación y afondó na idea de que'l mercáu llaboral asturianu aseméyase enforma al d'otros llugares. El Conseyeru d'Economía recordó que de los 80.000 puestos de trabayu que se crearon nos últimos años n'Asturies 20.000 foron pa universitarios.

L'informe Lorences, fechu sobre más de 3.100 entrevistes a titulaos que finaron los sos estudios ente'l 2000 y el 2001 defende que nos últimos años salieron de la Universidá 45.000 titulaos mientres que namás se crearon 16.000 emplegos específicos pa ellos. Sicasí, la cayida de la natalidá pue nun futuru facer qu'Asturies se convierta en deficitaria en titulaos universitarios

Opina en Conceyu Abiertu sobre esti asuntu