Asturies, Cantabria y Llión van facer un consorciu pa los Picos d'Europa

Asturies, Cantabria y Castiella y Llión van xestionar conxuntamente'l Parque Nacional de los Picos d'Europa per aciu d'un consorciu en que participen le trés alministraciones, que van facer del parque un "espaciu común"

Con ello, los Picos van tener un Plan únicu d'Ordenación y otru d'Usu y Xestión, dempués de que se llegare a pensar nuna posible francedura del parque ente les trés alministraciones autonómiques tres de conocese la sentencia xudicial que-yos daba tola potestá sobre los parques naturales a les autonomíes . Agora, les trés comunidaes van negociar xuntes les tresferencias del Estáu pa financiar el parque, repariéndoles dempués pa cada zona autonómica.

El Tribunal Constitucional emitiere en payares del 2004 la sentencia sobre un pleitu vieyu que punxeren yá nel 1997 los gobiernos d'Aragón y Andalucía contra una llei del Gobiernu del PP y que ponía en discutiniu que l'Estáu tuviere competencies na xestión de los Parques Nacionales. La sentencia definitiva apautaba que namás les Comunidaes Autónomes tienen autoridá na xestión d'estos espacios.

La decisión del Tribunal Constitucional recibióse con satisfacción nel Ministeriu de Mediu Ambiente y nes Comunidaes Autónomes, pero nun tenía'l preste de los grupos ecoloxistes, que víen nel fallu un "güelpe mortal" a la rede de Parques Nacionales y sobremanera al de los Picos, l'únicu onde la xestión ye compartida ente delles autonomíes (Asturies, Cantabria y Castiella y Llión). Con trés xestores distintos aplicando caún d'ellos podría nel so territoriu les polítiques que-y abultaren más afayadices en cada materia.