Asturies acumula seis meses d’aumentu del paru

Dende’l mes d’agostu, cuando se rexistraron 77.298 paraos, hasta febreru, que finó con 85.781, Asturies acumula seis meses d’aumentu continuu del desemplegu. Nos 28 díes últimos sumáronse 1.087 más, lo que supón una medra del 1,28 por cientu, superior a la media nel Estáu, onde se superen los 4 millones de demandantes de trabayu.

El sector servicios, en plena tercer fola de la pandemia de COVID-19, sigue siendo’l más afeutáu, cola construcción resistiendo meyor la situación y la industria baxando la cifra de paraos. En concreto, nueve de cada diez nuevos desemplegaos correspuenden al sector servicios, esautamente un 88,78 por cientu.

Los únicos territorios onde baxa la demanda de trabayu son Melilla (9,90 por cientu), Estremaúra (1,31), Euskadi (1,30) y Galicia (0,41). Les peores cifres rexístrales Navarra (3,02 por cientu), Aragón (2,35) y La Rioja (2,29).

La media estatal ye del 1,12 por cientu al aumentar el paru en 44.436 persones que ponen el total en 4.008.789, mentes que n’Asturies ye del 1,28 por cientu. La cantidá de demandantes d’emplegu nel país llega a 85.781 tres los 1.087 de febreru, acumulando seis meses de medra progresiva na que la llista del paru creció en 8.483 persones.

Asturies presenta meyores datos en comparanza con otres autonomíes na evolución interañal, con 12.841 paraos más, lo que supone un incrementu del 17,60 por cientu. Esti porcentaxe asítiase cuasi seis puntos perbaxo de la media estatal, que yel del 23,50 por cientu al sumar 762.742 desemplegaos.

Les peores cifres siguen siendo la de los principales focos turísticos, Illes Balears y Canarias, con una medra del 46,93 y 36,39 por cientu, de manera respeutiva. Melilla ye la única que ve descender el paru nesti añu, un 5,42 por cientu, con Estremaúra y Euskadi, con un 8,26 y un 10,06 por cientu, como les autonomíes con menores aumentos.

Aumenten les afiliaciones a la Seguridá Social

Magar del aumentu del desemplegu, en febreru produxéronse 327 afiliaciones nueves a la Seguridad Social, lo que significa un aumentu del 0,99 por cientu. Ye’l primer rexistru positivu nesti datu de los cuatro meses últimos.

No que se refier a les contrataciones, contabilizáronse 15.294, un 11,1 por cientu menos, de les que 1.680 son indefiníes.

La industria ye l'únicu sector onde baxó'l desemplegu en febreru.